Parade word kyk-en-jolkol

Theuns van der Westhuizen

Kaapstad. - Die Parade is ’n miernes soos werkers die eerste markiestente opslaan vir die grootste kyk-en-jolkol in die Kaap.

Wanneer dit klaar is, sal duisende sokkeraanhangers elke dag – van 11 Junie tot 11 Julie – hier saamtrek om fees te vier en sokker te kyk.

Al 64 wedstryde van die Wêreldbeker-sokkertoernooi sal op ’n reuse-TV-skerm van 11,5m x 6,4m uitgesaai word, en kunstenaars soos Goldfish, Freshly Ground, Danny K, Jimmy Dludlu en die Guguletu Tenors sal vermaak verskaf.

Kaapstad se amptelike Fifa Fan Fest, algemeen bekend as die amptelike kyk-en-jolkol, word op die Parade geskep.

“Ons wil ’n veilige, gerieflike en feestelike alternatief bied aan sokkeraanhangers wat nie ’n kaartjie vir wedstryde het nie. Hulle sal na regstreekse uitsendings van die wedstryde kan kyk,” het mnr. Lesley de Reuck, bedryfsdirekteur van die Kaapse 2010-span, gesê.

Die kyk-en-jolkol sal die hele toernooi lank elke dag van 11:00 tot 23:00 oop wees. Toegang is gratis, kos en drank sal te koop wees en toegangsbeheer geld. Net 25 000 mense sal op ’n slag toegang kry.

Volgens De Reuck sal streng veiligheidsmaatreëls geld. Veiligheidsbeamptes, nooddienspersoneel en lede van die polisie sal deurentyd teenwoordig wees.

Kinders onder 14 sal van ’n volwassene vergesel moet wees en geen gevaarlike voorwerp sal toegelaat word nie.

Onder die verbode voorwerpe tel spuitkannetjies, bottels, blikkies, glase, gevaarlike wapens, laserwysers, vlagstokke, klappers, vuurwerke, kieries en sambrele van langer as 40cm.

- Die Burger