Meer plaaslike kunstenaars by WB-konsert

Johannesburg - Meer Suid-Afrikaanse kunstenaars gaan op 10 Junie by Fifa se Wêreldbeker-konsert by die Orlando-stadion optree, het vervaardigers Maandag gesê.

Goldfish, Lira, Loyiso Bala, Kwani Experience, Steadyrock, Tumi Molekane en 340ml se name is ingesluit op 'n lys van plaaslike musikante wat deel van die konsert gaan wees, het Control Room, die vervaardigers, gesê.

Vroeër vandeesmaand het die vervaardigers aangekondig dat die ikoniese plaaslike jazz-musikant, Hugh Masekela, by Freshlyground, the Parlotones, Vusi Mahlasela en die Soweto Gospel Choir op die lys gaan plaas.

Internasionale sterre wat by dié konsert gaan optree, is Alicia Keys, The Black Eyed Peas, Angélique Kidjo, John Legend en Juanes.

Organiseerders het plaaslike kunstenaars ingesluit ná die ministerie van kuns en kultuur vir meer plaaslike verteenwoordiging gevra het.

"Ek is geëerd om deel te wees van dié historiese oomblik in Suid-Afrika se geskiedenis om as gasheer vir die eerste Fifa Wêreldbeker-toernooi op die Afrika-kontinent te dien en die eerste konsert wat daarmee gepaardgaan," het Lira gesê.

"Ek is opgewonde om saam met die ongelooflike groep Suid-Afrikaanse en internasionale kunstenaars op te tree – dit gaan verseker een van die beste musiekgeleenthede in Afrika wees.

Die konsert begin om 16:00 op 10 Junie en 30 000 aanhangers sal na verwagting die konsert bywoon.

– Sapa