Eerste WB-span vandag in die land
2010-05-25 22:23
- Artikelopsies
- Deel
- Kry Die Burger op
Theuns van der Westhuizen
Kaapstad
Die Wêreldbeker-sokkertoernooi is hier.
Die eerste span, dié van Australië, kom vandag in Suid-Afrika aan, en skaars 24 uur later land die span van Brasilië ook op die O.R. Tambo-lughawe in Johannesburg.
Die ander 29 buitelandse spanne kom daarna op feitlik ’n daaglikse basis aan – met Spanje heel laaste, op 11 Junie, het Fifa gister bekend gemaak.
Denemarke sal die eerste span wees wat hom in die Wes-Kaap kom vestig.
Dié span, wat in Knysna gaan bly, kom Saterdag aan, gevolg deur Frankryk op 5 Junie en Japan op 6 Junie. Die Franse span bly ook in Knysna, terwyl Japan se span hom in George gaan tuismaak.
Intussen het die nege gasheerstede ook begin om die tien 2010-stadions amptelik aan Fifa oor te dra.
Mnr. Jérôme Valcke, sekretaris-generaal van Fifa, en mnr. Danny Jordaan, hoof van Fifa se plaaslike reëlingskomitee, het reeds die naweek Soccer City in Johannesburg, Loftus Versfeld in Pretoria en die Royal Bafokeng-stadion in Rustenburg in ontvangs geneem.
Die stadion in Bloemfontein was gister aan die beurt en vandag oorhandig mnr. Dan Plato, burgemeester van Kaapstad, en me. Helen Zille, premier van die Wes-Kaap, die Kaapstad-stadion aan hulle.
Die Moses Mabhida-stadion in Durban kom daarna aan die beurt, gevolg deur Ellispark in Johannesburg, die Peter Mokaba-stadion in Polokwane, die Mbombela-stadion in Nelspruit en heel laaste die Nelson Mandelabaai-stadion in Port Elizabeth.
Tussendeur gaan Jordaan en ander lede van die reëlingskomitee die spanne op die O.R. Tambo-lughawe verwelkom.
Dit sal sokkerliefhebbers egter nie baat om na die lughawe te stroom nie, aangesien die gebou waar hulle aankom nie vir die publiek oop is nie.
Die beste plek om die spanne te sien, is by hul oefensessies.
Elke span moet minstens een openbare oefening hou voordat hy sy eerste wedstryd speel.
- Die Burger