Ysweer in Europa dalk weens aardverwarming

DEN HAAG. – Die uiterste koue vriesweer en swaar sneeuval wat Europa tans die derde agtereenvolgende winter ervaar, is ironies genoeg moontlik aan aardverwarming te wyte.

Prof. Stefan Rahmstorf van die Instituut vir Klimaatimpaknavorsing in Potsdam, Duitsland, het luidens ’n berig gister in die Londense oggendblad The Independent van ’n dramatiese verlies van see-ys in die Barentz- en Kara See tussen die Eurasiese vasteland en die Noordpool gepraat.

Hy het gesê sy instituut se rekenaarmodelle wys dat die smeltende ys ’n hardnekkige hoëdrukstelsel bo Noord-Rusland veroorsaak, met gepaardgaande yswinde wat die hele Europa teister.

“Die ysvrye gebiede van die oseaan tree as ’n verwarmer op omdat die water warmer as die lug daarbo is. Dit bevorder die vorming van ’n hoëdrukstelsel bo die Barentz See, wat koue lug in Europa instuur.”

Wat ook al die oorsaak, groot dele van Europa het gister opnuut in uiterste koue gebibber. In Duitsland is ’n rekord-laagtepunt van -28,8°C by Ueckermünde aan die Poolse grens gemeet, laer as die vorige rekord van -28,2°C wat in 1956 waargeneem is.

Rome, ’n stad wat nie dikwels sneeu sien nie, is in ’n chaos gedompel deur die swaarste sneeuval in 27 jaar, en vir die eerste keer in dekades het dit selfs oorkant die Middellandse See in Algiers gesneeu.

Nederland beleef die soveelste winter ’n algehele chaos op die spoorlyne. Kusprovinsies het een van die digste spoornetwerke in Europa, wat dit baie kwesbaar maak.

Die chaos op die Londense lughawe Heathrow het gister afgeneem ná ’n Sondag waarop 42% van die vlugte gekanselleer is. Die lugverkeer was gister taamlik normaal.

- Die Burger