Woede omdat gays skuld kry vir massamoord

Den Haag

Die feit dat die Nederlandse leër homoseksuele in sy geledere toelaat, was in 1995 verantwoordelik vir die massamoord op sowat 8 000 Moslem-mans buite Srebrenica in Bosnië.

Dié stelling van die afgetrede Amerikaanse genl. John Sheehan voor ’n senaatsverhoor in Washington het gister verontwaardiging in die Nederlandse hoofstad uitgelok.

Sheehan, ’n gewese bevelvoerder van Navo, het getuig in ’n reeks senaatsverhore oor die vraag of die Amerikaanse weermag openlik homoseksuele soldate moet toelaat.

Die implikasie dat homoseksuele om die een of ander rede lafhartig sou wees, is gister woedend in Nederland verwerp.

Verskeie waarnemers het daarop gewys dat gay soldate ook tans by die Nederlandse kontingent in Afganistan dien en dat niemand ooit ’n probleem met hul dapperheid het nie.

In 1995 het die Bosnies-Serwiese magte die VN-enklave van Srebrenica, waar duisende Moslem-vlugtelinge saamgetrek was, verower en sowat 8 000 mans vermoor.

’n Verswakte Nederlandse infanteriebataljon, beman deur dienspligtiges, en sonder enige swaar wapens of lugsteun, het hom daarop teruggetrek en nie by die massamoord tussenbeide getree nie.

’n Woordvoerder van die Nederlandse departement van verdediging, mnr. Roger van de Wetering, het gesê die Srebrenica-slagting is uitvoerig deur Nederland self, die VN en ander internasionale organisasies, asook verskeie navorsers ondersoek.

“Geen enkele operasie is só uitgebreid ondersoek as dié van Srebrenica nie.

“In al die ondersoeke is geen enkele verband gelê met homoseksualiteit nie.”

- Die Burger