Vier van Britse koerant in hegtenis geneem
2012-01-30 05:13
- Artikelopsies
- Deel
- Kry Die Burger op
Londen. – Vier joernaliste en ’n polisiebeampte is in hegtenis geneem nadat speurders eergister op die Britse poniekoerant The Sun se kantore en die verdagtes se huise toegeslaan het.
Dít was deel van ’n ondersoek na polisielede wat glo omgekoop is om inligting aan die joernaliste te verskaf.
Die vier joernaliste en die polisieman, wat nog nie geïdentifiseer is nie, is gistermiddag op borgtog vrygelaat.
The Sun is die koerant in Brittanje met die grootste sirkulasie en verkoop 2,5miljoen eksemplare per dag. Dit behoort aan Rupert Murdoch se mediagroep, News Corporation.
Die Sondagkoerant News of the World, wat in Julie verlede jaar gesluit is ná ’n meeluisterskandaal waarby van sy joernaliste betrokke was, was deel van dieselfde mediagroep.
Volgens die polisie is die mense in hegtenis geneem ná inligting deur Murdoch se NewsCorp, wat in Amerika gesetel is, aan hulle verskaf is.
Daar word gegis dat dié inligting aan die polisie deurgegee is in ’n poging om die maatskappy se naam in ere te herstel.
Die BBC en die Guardian het die joernaliste geïdentifiseer as die voormalige adjunkredakteur Fergus Shanahan, die voormalige besturende redakteur Graham Dudman, die misdaadverslaggewer Mike Sullivan en die hoof van die nuusafdeling, Chris Pharo.
In ’n e-pos wat aan personeel by The Sun gestuur is, sê die uitvoerende hoof van die Britse deel van News International, mnr. Tom Mockridge, dat die maatskappy regshulp aan die mans beskikbaar gestel het.
“Ten spyte van dié moeilike situasie is ons oortuig dat News International as ’n sterker en meer betroubare organisasie sal uitstyg.
“Ons moet almal vir Dominic (Mohan, redakteur van The Sun) ondersteun. Hy sal sy personeel lei om Maandag en ook daarna soos altyd ’n fantastiese koerant uit te gee.”
Volgens Scotland Yard is die inligting aan hulle verskaf deur NewsCorp se komitee wat bestuursake en standaarde hanteer. Dié komitee is ná die meeluisterskandaal op die been gebring.
“Dit het te doen gehad met verdagte betalings wat aan lede van die polisie gemaak is en het niks te doen daarmee om joernaliste sover te kry om hul vertroulike bronne bekend te maak vir inligting wat wettig bekom is nie.”
NewsCorp het bevestig dat vier van die mans wat in hegtenis geneem is, by The Sun werk of voorheen daar gewerk het.– Sapa-AFP
- Die Burger