Talle betogers sterf in Egipte
2012-02-06 01:52
- Artikelopsies
- Deel
- Kry Die Burger op
KAÏRO. – Betogers het polisiewagte by die Egiptiese departement van binnelandse sake gister met klippe bestook totdat hulle met traanrook teruggedwing is.
“Hulle eis dat die weermag polities onttrek en dadelik die aanvang van nominasies vir die presidensiële verkiesing aankondig,” sê mnr. Waleed Saleh (30), ’n prokureur en een van die aktiviste.
Betogers beskuldig die departement dat hy nie die dood van 74 mense verlede Woensdag in ’n stormloop ná ’n sokkerwedstryd in Port Said kon verhoed nie.
Dit was die vierde dag van botsings waarin sewe mense dood is. Nog vyf is in Suez dood.
Baie mense is kwaad omdat die polisie dieselfde hardhandigheid handhaaf as in die Moebarak-era.
Die militêre raad, wat die bevel oorgeneem het toe Moebarak verlede jaar op 11 Februarie onttroon is, het belowe om die mag teen die einde van Junie, ná die verkiesing, aan burgerlikes te oorhandig.
- Die Burger