Straw sê dertig Britse gevangenes se dreigende Facebook-inskrywings is strooi en moet weg

Den Haag

Die Britse minister van justisie, mnr. Jack Straw, het die inskrywings van 30 gevangenes op Facebook laat onttrek omdat hulle dit gebruik het om hul slagoffers te dreig en te teister, luidens berigte in die Britse pers.

Die kwessie het verleentheid vir die regering veroorsaak, omdat die beginsel van vryheid van spraak en die regte van slagoffers ter sprake kom.

Die betrokke gevangenes, wat meestal weens geweldsmisdade toegesluit is, het ingesmokkelde selfone gebruik om boodskappe op Facebook te publiseer waarin hulle te kere gaan teen hul slagoffers en mense wat teen hulle getuig het.

Ryan Lloyd (22), wat in die tronk sit omdat hy sy mede-bendelede opdrag gegee het om ’n lid van ’n mededingende bende te vermoor, het kodetaal – “dead dogs” – gebruik om opnuut ’n moordopdrag aan sy ondersteuners te gee.

Colin Gunn, wat gevonnis is omdat hy saamgesweer het om ’n egpaar te vermoor, het op Facebook gewaarsku: “Ek kan nie wag om in sekere mense se oë te kyk en hul vrees vir my daar te sien nie.”

Jade Braithwaite, wat ’n tiener doodgesteek het, het op Facebook gesê hy is “down, but not out”.

Facebook het onmiddellik sy samewerking aan Straw gegee om sulke boodskappe te skrap.

Burgerregte-aktiviste het gesê Straw se stap beperk gevangenes se regte. Maar mnr. Gary Trowsdale, woordvoerder van ’n groep wat familielede van vermoordes verteenwoordig, het gemeen ’n gevonniste gevangene verloor volgens wet sy burgerregte.