Santorum krap als deurmekaar

Net toe mense kon dink dat mnr. Mitt Romney se pad na die Republikeinse Party se kandidatuur vir die presidentskap ooplê, is alles weer deurmekaargekrap met mnr. Rick Santorum se onverwagse sege in Missouri, Minnesota en Colorado.

Santorum is ’n Rooms-Katolieke fundamentalis wie se streng Christelike waardes klaarblyklik goed ontvang is in dié drie taamlik konserwatiewe state.

Hiermee is Santorum, wat tot dusver beskou is as niks meer as ’n buiteperd nie, in die sentrum van die wedloop geplaas.

Romney lyk kwesbaarder as ooit. By sommige Republikeine aan die regterkant van die politieke spektrum is sy sentristiese oortuigings ’n nadeel, soos ook sy lidmaatskap van die Mormone, ’n sekte wat deur talle Christene nie as deel van die Christendom erken word nie.

Bowendien hou al hoe minder kiesers van sy geweldige rykdom. Sy teenstanders verwyt hom dat hy sy geld op die rug van die armes verdien het, en dit begin blykbaar by sommige ingang vind.

Met dié oorwinning is Santorum nie slegs vir Romney ’n bedreiging nie, maar ook vir die wispelturige mnr. Newt Gingrich.

Gingrich verkoop homself as synde na aan die Republikeinse uiterste regtervleuel, maar hy word wyd beskou as ’n ongeleide missiel wat nie teen pres. Barack Obama kan wen nie.

Gingrich het skaars deelgeneem aan die voorverkiesings in die drie state. Hy vestig sy hoop op die Amerikaanse suide, waar sy aanhang vermoedelik groter is.

Die aandag verskuif juis nou na die sogenaamde “Super-Dinsdag”, op 6 Maart, wanneer voorverkiesings tegelyk in tien state gehou sal word.

Hulle is Alaska, Georgia, Idaho, Massachusetts, Noord-Dakota, Ohio, Oklahoma, Tennessee, Vermont en Virginië

Dit is moontlik dat die uitslag van die wedloop op 6 Maart bepaal word.

Maar sulke voorverkiesings – soos dié van eergister bewys het – het die nare gewoonte om alle profete verkeerd te bewys.

- Die Burger