Plofbare kougom blaas student se kaak af

Kiëf - 'n 25-jarige chemie-student is dood gevind en sy kakebeen deur wat ondersoekbeamptes as "plofbare kougom" bestempel, afgeblaas.

Sy verminkte oorskot is by sy ouerhuis in die noorde van Oekraïne gevind.

Die jong man het aan die Politegniese Instituut studeer.

Hy het Saterdagaand laat aan 'n rekenaar gewerk toe die ontploffing plaasvind.

"'n Harde geluid kon uit sy kamer gehoor word," berig ukranews.com.

"Toe sy familie die deur oopmaak, het hulle gesien dat die onderste gedeelte van die man se gesig afgeblaas is."

'n Forensiese ondersoek het vasgestel dat die kougom bedek was met 'n onbekende chemiese stof wat glo met 'n plofbare materiaal gemaak is.

Die student het glo 'n gewoonte gehad om kougom te eet ná hy dit in 'n suur gedoop het.

Beamptes het sitroensuur-pakkies en 'n soortgelyke maar onbekende middel, wat glo 'n plofbare materiaal is, op 'n tafel naby die lyk gevind.

Ondersoekbeamptes vermoed die student het die twee pakkies per ongeluk omgeruil en die kougom met die plofbare materiaal in sy mond gesit.

Forensiese deskundiges is onderweg van Kiëf om dié materiaal te ondersoek. Plaaslike owerhede vrees dat dit dalk sal ontplof as dit vervoer word.

– Sky News