Mosie oor Afrikaans aanvaar

DEN HAAG. – Die Interparlementêre Kommissie van die Nederlandse Taalunie het gistermiddag hier ’n mosie tot steun van die behoud van twee Afrikaanse universiteite met algemene stemme aanvaar.

In die mosie word die regerings van Nederland en Vlaandere ook gevra om Afrikaans aktief te ondersteun.

Die mosie is voorgestel deur die voorsitter van die kommissie, mnr. Martin Bosma, Nederlandse parlementslid van die Partij voor de Vrijheid (PVV), die mees regse party in die parlement. Hy het egter sekondante oor die hele politieke spektrum van links tot regs gewerf.

Alle lede van die kommissie het vir die mosie gestem, ook dié wat dit nie gesekondeer het nie.

Die taalunie is die orgaan waarin die Nederlandse, Vlaam­se en Surinaamse regering oor hul gemeenskaplike taal saamwerk. Suid-Afrika het ’n verklaring van voorneme tot samewerking onderteken, maar nog niks gedoen om dit in die praktyk toe te pas nie.

Die kommissie het gister in die senaatsaal van die Nederlandse parlement vergader.

Die aanvaarding is ’n deurbraak vir politieke rugsteun van Afrikaans in die Lae Lande. Dit wys dat die smet van apartheid – soos dit nog lank hier gesien is – nie meer aan die taal kleef nie, en dat die ongeduld met die ANC-regering oor sy aktiewe verwaarlosing van Afrikaans begin toeneem.

Bosma het die aanvaarding van die mosie gistermiddag in ’n verklaring “’n belangrike sein” genoem.

“Die Nederlandse en Vlaamse politiek begin stadig weer ’n oog te kry vir Afrikaans.

“Die Lae Lande het die taal van N.P. van Wyk Louw en Eugène Marais blykbaar nog nie opgegee nie.”

- Die Burger