Kragkrisis kan Duitsland tref oor koue

DEN HAAG. – Die uiterse koue in Europa veroorsaak dat Duitsland tans op die grens van sy kragopwekkingsvermoë is. As dinge net ’n bietjie erger word, sal beurtkrag daardie land se lot wees, berig verskeie Duitse koerante.

Die belangrikste oorsaak hiervan is dat die regering ’n aantal ouer kernkragsentrales ’n jaar gelede na aanleiding van die kernramp in Foekoesjima, Japan, summier laat afskakel het. Daar is toe besluit om op die duur afskeid van kernkrag te neem.

Dit beteken dat Duitsland op die oomblik moet staatmaak op ouderwetse besoedelende bruinkool- en oliesentrales, asook op son- en windkrag.

Tans word die situasie gered deurdat die lug bokant Duitsland, ofskoon yskoud, onbetrokke is, en die sonkragopwekkers produseer maksimum energie. Maar dit is ook windstil, wat beteken windmeulparke lewer nie veel op nie.

Ná die besluit oor die kernkragsentrales het die energie-owerheid besluit om ou sentrales wat reeds gesluit is vir noodgevalle voor te berei. Hulle werk tans ook voluit, en verder word elektrisiteit by tye uit Oostenryk ingevoer.

Maar die grens is min of meer bereik. “Die situasie is onder druk, maar nog net nie kritiek nie,” het ’n woordvoerder van die elektrisiteitsmaatskappy Tennet aan die Frankfurter Allgemeine Zeitung gesê.

- Die Burger