Koningin vier stil-stil 60 jaar op die troon

DEN HAAG. – Koningin Elizabeth II het haar diamant-regeringsjubileum gister sonder fanfare met ’n normale werkdag gevier.

Sy het ’n laerskool naby haar Sandringham-buiteverblyf besoek, waar die kinders ’n toneelstuk oor haar regering opgevoer het.

Sy het ook die stadhuis van die dorp King’s Lynn besoek. ’n Paar honderd onderdane het die snerpende koue getrotseer om haar te begroet.

Later die dag was daar ook ’n kanonsaluut van 41 skote by Hyde Park in Londen, en ’n kanonsaluut van 61 skote by die Londense Tower.

Die koningin het self verkies om nie ’n groot herdenking te hou nie. Gister was naamlik nie net die 60-jarige viering van haar troonsbestyging in 1952 nie, maar ook die herdenking van die sterfdag van haar pa, koning George VI.

Die hoofviering sal in die Europese somer, in Junie, plaasvind, wanneer die weer ook beter is vir ’n reeks feeste in die buitelug.

In ’n boodskap aan haar onderdane het Elizabeth haar opnuut aan haar nasie toegewy. Sy het gesê sy is diep geroer deur al die boodskappe van steun wat sy en haar man, die hertog van Edinburgh, ontvang het.

Sy kyk na die toekoms met ’n “helder kop en warm hart” en beklemtoon die belang van familie, vriendskap en goeie buurskap.

Ook die huidige premier, mnr. David Cameron, het hulde aan die vorstin gebring deur haar te bedank vir haar “manjifieke diens” en die wyse waarop sy die land “met waardigheid en stille gesag” lei.

Cameron is die twaalfde premier sedert die koningin die troon bestyg het. Op 85 is sy die oudste regerende monarg ter wêreld, en as sy teen 2015 nog leef, sal sy wyle koningin Victoria as die langs regerende Britse vors verbysteek.

- Die Burger