Guinness eis ‘oudste atleet’ (100) se geboortesertifikaat
2012-02-06 01:52
- Artikelopsies
- Deel
- Kry Die Burger op
HONGKONG. – ’n Honderdjarige Brits-Indiese man, wat beweer hy is die wêreld se oudste marathon-atleet, het gister breed geglimlag toe hy die 10km- wedloop van die Hongkong-marathon voltooi het.
Mnr. Fauja Singh, oftewel “Turbaned Torpedo”, het die afstand in net meer as een uur en 34 minute afgelê en daarmee HK$200 000 (R194 027) vir die liefdadigheid ingesamel.
Singh skryf sy fiksheid toe aan sy gesonde leefstyl sonder rook of alkohol en ’n vegetariese dieet.
Die Guinness World Records weier glo om hom as die wêreld se oudste marathonatleet te erken omdat hy nie ’n geboortesertifikaat ingedien het nie.
Singh het al verlede Oktober beweer hy is die eerste honderdjarige marathonatleet toe hy die Toronto Waterfront voltooi het.
’n Rekordgetal van 70 000 atlete het vanjaar deelgeneem aan die Hongkong-marathon wat ’n volmarathon van 42km, ’n halfmarathon en ’n 10km-wedloop insluit.
’n Man (26) het by die halfmarathon-eindstreep inmekaargesak en is by die hospitaal dood verklaar. – Sapa-AFP
- Die Burger