Dié dieretuin gaan harte steel
2012-01-20 06:00
We Bought a Zoo
Drama
4/5
Met Matt Damon, Scarlett Johansson, Thomas Haden Church, Colin Ford en Maggie Elizabeth Jones.
Regie: Cameron Crowe
Ná sy vrou se dood besluit Benjamin Mee (Matt Damon) hy en sy kinders het ’n nuwe begin nodig.
Sommige mense verander van beroep of koop ’n kleinhoewe en begin met lamas boer. Benjamin neem dit ’n tree verder en koop ’n tamaai hoewe buite San Diego – een wat ’n verwaarloosde dieretuin bevat.
Benjamin is nie die soort ou wat iets halfmas doen nie. Hy is avontuurlustig en spontaan en leef volgens die leuse wat sy ouer broer kleintyd by hom ingeburger het: Al wat jy nodig het, is 20 sekondes van irrasionele dapperheid, en net goeie dinge kan daarvan kom.
Sy twee kinders reageer uiteenlopend. Die kleuter, Rosie (’n dierbare Maggie Elizabeth Jones), is in haar noppies, terwyl die tiener, Dylan (Colin Ford), nie minder beïndruk kan wees nie. Nie eens die langbeen-Lily (Elle Fanning), wat in haar aftyd by die dieretuin uithelp, kan hom uit sy selfbehepte stilstuipe lig nie.
Benjamin gryp egter die droom met albei hande aan en begin hard werk saam met die dieretuin se lojale werknemers om dié onderneming weer tot sy trotse en winsgewende glorie te herstel.
Saam met die vaardige bestuurder, Kelly (Scarlett Johansson, wat haar bes doen om soos die ‘meisie langsaan’ te lyk), word die een struikelblok ná die ander oorkom – as Benjamin se geld net kan hou...
Ek weet die jaar is nog in sy babaskoene, maar ek wil voorspel die kans is skraal dat jy vanjaar ’n groter goedvoel-fliek gaan teëkom. Dis twee uur van pure lewensvreugde.
Van die regisseur Cameron Crowe het ons laas in 2005 iets gesien (en toe was dit die powere Elizabethtown).
Jare lank was hy tjoepstil en toe skielik verlede jaar spring hy weg met twee dokumentêre musiekprente én Zoo.
Dis ’n tydige en welkome terugkeer tot die silwerdoek. Die verhaal neig dikwels na soetsappigheid, maar dié optimisme is geanker in die werklikheid – dis gegrond op die ware Mee en sy gesin se ervaringe met die Dartmoor-dieretuin in Engeland.
Voorts bring Damon so ’n oorrompelende kombinasie van warmte, deernis en weerloosheid na sy rol dat alle klagtes wat jy wil begin opgaar, soos mis verdwyn wanneer hy op die skerm is. Sy spel as ’n man wat iets nuuts probeer terwyl hy nog oor sy ou lewe (saam met sy geliefde vrou) treur, is trefseker en baie aangrypend.
Voeg daarby ’n baie genotlike dosis humor, veral verskaf deur Thomas Haden Church in die rol van Benjamin se broer, en We Bought a Zoo bied ’n heerlike uitstappie vir die hele gesin.
Ouderdomsperk: 10TV. Tydsduur: 121 minute.
- Soortgelyke prent: Secretariat.