‘Wonder-Tsjeg’ seëvier

PRETORIA. – Die 25-jarige Tsjeggiese pianis Lukáš Vondrácek het ­Saterdagaand die 12de Unisa­Vodacom- ­internasionale klavier­kompe­tisie gewen.

Hierdie oorwinning het aan ­Vondrácek – of tereg die “wonder-Tsjeg” – nagenoeg R262500 verseker; en met vier spesiale pryse op die koop toe het hy R300000 verdien.

Dié pianis, wat uitermate beïndruk het in die eindronde met sy weer­gawes van concerto’s van Mozart en Rachmaninof, was boonop die eerste ontvanger van die John Roos- spesiale beoordelaarsprys van R250000, ­geskenk deur die Unisa-direktoraat.

Hierdie prys is in die lewe geroep om mnr. John Roos, adjunk-direkteur van Unisa se musiekstigting en jarelange artistieke direkteur van Unisa se ­internasionale musiek­kompetisies, te vereer vir sy uit­sonderlike bydrae tot die universiteit en musiek. Prof. Mandla S. ­Makhanya, vise-kanselier van Unisa, het dit aangekondig.

Die jongste finalis, Heejae Kim (24) van Suid-Korea, het die tweede prys (R187500) verower. Die Rus Stanislaf Khristenko (27) het derde geëindig en R150000 verdien. Sebastian De Bin (30) van Italië het R112500 vir sy ­vierde plek ontvang en Enrique ­Bernaldo de Quiros (30) van Spanje en Christopher Janwong McKiggan (26) van Brittanje het onderskeidelik vyfde en sesde geëindig en elk R75000 gekry.

Die wenners van die spesiale pryse is:

• R65000: die belowendste Suid-Afrikaner, wat ’n Dietmann-klavier ­­ont­vang (geborg deur die Klaviersentrum): Megan-Geoffrey Prins (SA);

• R10000: die belowendste halfeind-finalis wat nié die eindronde gehaal het nie (Unisa-direktoraat): Luka ­Okrostsvaridze (Georgië);

• R3000: vir die beste vertolking van ’n Barok-werk in die eerste ronde ­(James Verwey-trust): Stanislaf Khristenko (Rusland);

• R2500: die beste weergawe van Graham Newcater se Tokkate (Desmond Willson-trust): Prins;

• R2500: die beste weergawe van ­Peter Klatzow se Dazzle (Desmond Willson-trust): Vondrácek (Tsjeggië);

• R5000 (Marc Raubenheimer-prys): die beste weergawe van ’n sonate uit die klassieke periode in die tweede ronde (Damaris Loubser): Gehui ­Xu (China);

• R10000: die beste solo-uitvoering in die halfeindronde (Desmond ­Willson-trust): Vondrácek;

• R12000: die beste weergawe van ’n concerto in die eerste deel van die eind­ronde (Unisa-musiekstigting): ­Vondrácek; en

• R12000 vir die beste weergawe van ’n concerto in die tweede deel van die eindronde (Unisa-musiekstigting): Vondrácek.

- Die Burger