Toffie Pop skep geleenthede om kreatief saam te werk

Vanjaar neem meer as 60 ­deel­nemers uit verskeie kreatiewe genres deel aan Toffie Pop, ’n ­internasionale ­kultuur-konferensie en -fees wat ­aan­staande maand in die Kaapstadse ­stadsaal plaasvind.

Ontwerpers, kunstenaars, ­musi­­­kante, rolprentregisseurs, tydskrifredakteurs en uitgewers van oor die wêreld heen sal van 30 Maart tot 1 April as sprekers of uitstallers aan die fees deelneem. Die geleentheid fokus op eietydse populêre kultuur, ­ontwerp, musiek, tydskrifte, kuns, klankontwerp en “enigiets ­anders wat vermaak”.

Volgens Peet Pienaar, kreatiewe direkteur van die ontwerp­ateljee The President en organiseerder van Toffie Pop, is die doel daarvan om te dien as ’n ­internasionale ontwerp-netwerk waardeur Suid-Afrikaanse ontwerpers internasionale blootstelling kan kry. “Dit gaan oor die skep van konneksies en beter werk deur deelname,” sê hy.

Die deelnemers sluit in Penny Martin (Brittanje), hoofredakteur van The Gentlewoman, die rolprent regisseur Roul Wouters ­(Nederland), Omar Sosa ­(Spanje), artistieke direkteur, uitgewer en grafiese ontwerper van die tydskrif Apartamento, die broers Juan en Alejandro ­Mingarro van die Brosmind-ateljee in Barcelona, die mode-aankoper en blogger Malibongwe Tyilo van Suid-Afrika, die kontemporêre kunstenaar Athi-Patra Ruga en die filmregisseur Chris Bisset, albei Suid-Afrikaners.

Daar sal ook ’n internasionale kompetisie wees waarin ses spanne meeding in ’n reeks uitdagings wat op die fees gestel sal word. Die Suid-Afrikaanse span bestaan uit Smiso Zwane, ­Zamani Xolo, Paul Shiakallis en ­Manto Ribane. Hulle sal spanne van Spanje, Nederland, Switserland, Brittanje en Argentinië die stryd aansê.

Kaartjies vir die geleentheid kos R750 en bied toegang tot die volle konferensie van drie dae, insluitend die praatjies, uitstallings, mark en kosstalletjies. Werk­sessies kan teen R250 elk by­gewoon word. Bespreek by ­toffie@­thepresident.co.za.

 

- Die Burger