Pendelaars se lot onder loep

KAAPSTAD. – Verlede jaar het Riaan Visman die produksie Kap ’An op die Die Burger-Suidoosterfees met die samewerking van die Stad Kaapstad geopen. Vanjaar kan gehore uitsien na sy tweede stuk, die kabaret Trein Smash. Dit handel oor twee vryskut-akteurs wat elke dag treinry om by oudisies en repetisies uit te kom. Op pad na ’n baie belangrike oudisie sit hulle gestrand weens Metrorail se probleme.

In die stuk word skerp sosiale kommentaar gelewer en is daar kritiek op Metrorail en die stand van openbare vervoer, waarvan duisende pendelaars daagliks afhanklik is.

Saam met Visman in die rolverdeling is Stephanie Badenhorst. Rika Vermeulen begelei hulle op klavier.

Volgens Visman is die teks gegrond op waarnemings en werklike ondervindings.

“Dit gaan oor frustrasie, maar die hoofdoel is om mense van pendelaars se probleme bewus te maak. Ons soek ook na oplossings vir die probleme.”

Juis om hierdie rede is daar ’n gesprek oor die stuk na afloop van die opvoering op die Suidoosterfees op Saterdag 18 Februarie om 16:30 in die Kunstekaap se kandelaar-operakroeg. Dit sal ’n halfuur lange vraag-en- antwoord-­gesprek wees oor hoe die kunste druk kan toepas ­sodat openbare vervoer kan verander en ver­beter ter wille van pendelaars.

“Ons het ’n soortgelyke gesprek gevoer toe ons die stuk verlede jaar in die Aan de Braak- en Klein Libertas-teater opgevoer het. Dit was baie insiggewend.” Die teoloog Laurie Gaum sal die ­gespreksleier wees.

• Kaartjies vir Trein Smash kos R70 en kan by Computicket bespreek word. Die stuk gaan ook op die KKNK opgevoer word.

- Die Burger