Nederlandse fees fokus op Van Niekerk se digkuns
2010-12-07 01:57
- Artikelopsies
- Deel
- Kry Die Burger op
Kaapstad - Die literêre stigting Perdu fokus vandeesmaand op die digterskap van Marlene van Niekerk.
In die program op 10 Desember in Amsterdam is Rosemarie Buikema en Alfred Schaffer saam met Van Niekerk op die verhoog.
Buikema is hoogleraar aan die Universiteit van Utrecht en Schaffer is ’n digter en redakteur by die uitgewery Bezige Bij.
Buikema sal die aand inlei en Schaffer sal met Van Niekerk gesels oor die verhouding tussen haar poësie en romans, asook haar rol as digter en romanskrywer. Van Niekerk sal die aand afsluit met ’n voordrag uit haar poësie.
Haar bundel verhale Die Sneeuslaper het verlede jaar in Nederlands verskyn en is onlangs in Afrikaans uitgereik. Nederlandse lesers is bekend met haar romans Triomf, Agaat (albei topverkopers) en Memorandum.
Volgens Perdu is tot op hede te weinig aandag aan haar digterskap gewy. Haar digbundels Sprokkelster en Groenstaar is nog nie in Nederlands vertaal nie.
Van Niekerk het in die tagtigerjare aan die Universiteit van Amsterdam filosofie gestudeer.
Die Universiteit van Tilburg het verlede jaar ’n eregraad aan haar vir haar oeuvre toegeken, terwyl die fakulteit van geesteswetenskappe daar ’n kongres, De Klank van het Fragiele, met en oor haar werk aangebied het.
In 2009 het sy ook die Albert Verwey-lesing aan die Universiteit van Leiden gelewer.