Kurt sit groot name ore aan met CD-verkope
2010-01-04 04:15
- Artikelopsies
- Deel
- Kry Die Burger op
Philip de Bruin
Kaapstad
Kurt Darren het verlede jaar die meeste CD’s – plaaslike en internasionale kunstenaars ingesluit – in Suid-Afrika verkoop.
Sy CD Uit die diepte van my hartwas volgens die amptelike lys van topverkopers in Suid-Afrika die beste verkoper in 2009 (meer as 160 000).
Dié CD was 35 weke op die lys van Top 20-verkopers.
Darren het afgereken met gerekende oorsese kunstenaars soos Josh Groban, Michael Jackson, Susan Boyle, Whitney Houston en Enrique Iglesias.
Die Top 30-CD’s van die jaar word bereken aan die hand van alle CD’s se verskyning deur die jaar op die amptelike weeklikse Top 20-lys, wat op sy beurt bereken word aan die hand van verkoopsyfers van handelaars.
Die Top 30-lys, wat die naweek bekend gemaak is, het ook ’n eerste in Suid-Afrika opgelewer – al vyf die topverkopers is Afrikaanse sangers.
Darren was gister verheug toe hy die nuus hoor. “Dit is fantasties. Ongelooflik.
“Dié goeie nuus kry ek net ’n week nadat ek gehoor het dat my jongste CD, Beste Medisyne, op die punt staan om dubbel-platinumstatus (80 000 verkope) te bereik – binne ’n maand nadat dit vrygestel is.
“As hy dié status bereik, sal dit my negende CD wees wat dubbel-platinumstatus bereik. Ek het werklik baie om voor dankbaar te wees.”
Niemand kon die naweek al sê of Darren nou vir Steve Hofmeyr as algehele topverkoper van CD’s van lewende sangers verbygesteek het nie.
Die organisasie Recording Industry of South Africa sal later dié syfers bekend maak.
Wyle Gé Korsten en Bles Bridges is egter steeds die voorlopers.
Bok van Blerk was 2009 se naaswenner met sy CD Afrikanerhart (30 weke op die Top 20).
In die derde plek is 10 Jaar Platinumtreffers van Juanita du Plessis (28 weke), vierde is Breek die ys (23 weke) van Ray Dylan en vyfde Ons lieflinge/Our darlings (22 weke) van Corlia (Botha) en Rudi (Claase).
- Die Burger