Kuifie-boek nie rassisties, sê hof

’n Belgiese hof het ’n bewering verwerp dat Tintin in the Congo rassisties is, asook ’n versoek dat dié omstrede strokiesboek aan die mark onttrek word.

CBCNews berig ’n hof in ­Brussel, België, het pas ’n beslissing bekend ­gemaak wat die eis van Mbutu Mondondo Bien­venu, ’n Kongolese man, verwerp. Bienvenu het die saak in 2007 ­begin. Indertyd het sommige Amerikaanse en Britse boekwinkels die boek uit hul ­kinderboek-af­deling verwyder nadat daaroor beswaar gemaak is.

Bienvenu was ’n student in die politieke wetenskap wat in Brussel gewoon het toe hy ’n veldtog teen die boek ­begin het. Hy het ’n klag aanhangig gemaak dat Tintin in the Congo, die tweede boek in die reeks deur Georges Remi (wat onder die naam Hergé gewerk het) vol rasse-stereotipering is.

Hy het die uitgewer Moulinsart gevra om die strokiesboek aan die mark te onttrek of alternatiewelik ’n plakker of ’n voorwoord by te voeg wat verduidelik dit is in ’n ander tydvak geskryf, soos wat die geval met die Engelse weergawes is.

Die Belgiese hof het Vrydag in sy uitspraak gesê die boek – wat in 1946 gepubliseer is – is geskryf in die koloniale tydperk en dat daar geen bewyse is dat die Belgiese strokieskunstenaar Hergé opsetlik probeer het om rassehaat aan te blaas met die verhaal nie. Die kollig is opnuut op die Kuifie-verhale ­vanweë die onlangse ­rolprent- verwerking van The Adventures of Tintin. Dit is in 1929 as ’n strokiesreeks van Hergé gepubliseer. Die Kongo (Kinshasa) was ’n Belgiese kolonie tot 1960 en oor die jare is Tintin in the Congo telkens gestriem vir ’n negatiewe uitbeelding van Afrikane. Hergé het later in sy lewe gesê hy was nie gelukkig met die werk nie. Bien­venu se regsverteenwoordigers het gesê hul kliënt wil ­teen die uitspraak appelleer.

- Die Burger