Kubaanse groep besoek SA die eerste keer
2012-02-08 00:00
- Artikelopsies
- Deel
- Kry Die Burger op
Die Kubaanse dansgeselskap Lizt Alfonso Dance Cuba besoek Suid-Afrika binnekort die eerste keer.
Dié besoek is moontlik gemaak deur die departement van kuns en kultuur, wat Mzansi Productions gevra het om as gasheer op te tree. Mzansi het al jare ’n band met Kubaanse dansgeselskappe.
Lizt Alfonso Dance Cuba is van Vrydag tot Sondag in die Spier-amfiteater in Stellenbosch en van 17 tot 19 Februarie in Johannesburg in die Lyric-teater by Gold Reef City.
Dié geselskap van Havana is in 1991 deur die choreograaf Lizt Alfonso gestig. Die groep is bekend om sy samevoeging van ballet, kontemporêre dans en flamenco-elemente met Spaanse en Afro-Kubaanse ritmes. Hulle maak deurentyd van ’n orkes op die verhoog gebruik.
Benewens die optredes is die geselskap ook betrokke by choreografie-werksessies in Khayelitsha, Guguletu en Soweto.
Die optredes in die Spier-amfiteater is Vrydag om 21:00 en Saterdag en Sondag om 20:30. Kaartjies kos R150, R140 en R120, met ’n 50%-afslag vir skole in al die prysklasse. Bespreek by Computicket.
- Die Burger