Joost se biografie binne 24 uur uitverkoop
2009-11-04 08:51
- Artikelopsies
- Deel
- Kry Die Burger op
Die eerste oplaag van Joost van der Westhuizen se boek, Joost: Man in
the Mirror, het Maandag binne 24 uur uitverkoop.
Me. Kim Taylor van Random House Struik, wat die boek uitgee, het
gesê “duisende” eksemplare was Maandagoggend in boekwinkels. “Teen Maandagaand
was geen enkele eksemplaar meer oor nie.”
Die Afrikaanse weergawe, Joost: Spieëlbeeld, was
gister op die rakke, maar Taylor kon teen druktyd nog nie sê presies hoeveel
eksemplare verkoop is nie. “Ek kan wel sê selfs Steve Hofmeyr se outobiografie,
Mense van My Asem, het nie só goed verkoop nie. Joost se boek is
trouens een van die twee topverkopers onder die biografieë wat ons uitgegee het.
Die ander was dié van Jake White (gewese Springbok-afrigter), In
Black and White.”
Me. Amelia Griesel, president van die Suid-Afrikaanse
Professionele Poligraaf-assosiasie (Sappa), het gister haar afkeur uitgespreek
oor die hantering van die leuenverklikkertoets wat Van der Westhuizen oor ’n
seksvideo afgelê het. Hy het die naweek gesê die uitslag in sy guns “was
duidelik vals omdat ek gelieg het”. Sy private ondersoeker, mnr. Mike Bolhuis,
het gesê daar is met die toets gepeuter. “Die gebeurtenis?.?.?. druis in teen
die professionele en etiese gedrag wat deur Sappa-lede gehandhaaf word,” het
Griesel gesê. – Philip de Bruin