Ebersohn se bron van stories loop nou weer oor

Kaapstad

Veertien jaar was geheel en al te lank om te wag vir Wessel Ebersohn se jongste boek. Gelukkig het sy uitgewer ’n ooreenkoms wat twee boeke insluit met hom gesluit en is hy ook klaar met ’n derde.

The October Killings het einde verlede jaar verskyn ná Ebersohn se stilte van meer as ’n dekade. Voorheen het hy sewe boeke ­geskryf wat in 11 tale vertaal is. As joernalis het hy ook verskeie ­artikels vir plaaslike en inter­nasionale publikasies gelewer.

“Dit was nooit my bedoeling om so lank te wag nie, maar daar was twee redes daarvoor. My boeke het altyd in Suid-Afrika afgespeel met plaaslike gebeure daarby ingewerk. Twee van my boeke is ­verban. Ek het nie ’n aktivis probeer wees nie. Ek het eerder sake in my boeke verduidelik.

“Die ander rede is die tydskrif (die Suid-Afrikaanse Success) wat ek en my gesin begin het. Dit het tyd gevat om dit sterk te vestig.”

In The October Killings is Ebersohn se eksentrieke en onwaarskynlike held ’n tronksielkundige, Yudel Gordon, weer terug. Hy stel ook die interessante nuwe karakter Abigail Bukula aan die leser bekend. Dit is goeie nuus dat albei weer in die volgende boek (die werktitel is tans Things That Love Night) die hoofkarakters is.

Dis vir Ebersohn belangrik dat hy sy ­lesers “bladsy vir bladsy saamneem” met die verhaal.

Vir navorsing oor die ­karakter in aanhouding in The October Killings, het hy mense maksimum-sekuriteitsaanhouding besoek.

“Dit was interessant en traumaties. Dit het my werklik uitgeput, maar my soveel insig gegee in die mense se dikwels tragiese kinderdae en wat hulle gevorm het.”

Ebersohn en sy vrou het in die ­jare tagtig ’n ­hospitaal vir ­diere en voëls in die Knysnawoud bedryf. In hierdie tyd het navorsing hulle laat besef dat daar ’n behoefte is aan ’n tydskrif wat mense in die sakesektor kan inlig oor ­ ­onder meer entrepreneurskap.

Onder sy vorige boeke tel A ­Lonely Place To Die, The ­Centurion, Divide The Night en Store Up The Anger. Yudel Gordon was ook onder meer in sy boek ­Closed Circle die hoofkarakter.

Hy beskryf sy verhale as politieke rillers met meer om die lyf as bloot ’n moord of misdaad en die oplos daarvan.

“As daar ’n storie is, kan ’n mens nie help om dit te wil vertel nie. By my het die bron oorvol geword en die stories het begin uitloop. Ek voel so verlig dat ek weer skryf en dis heerlik om weer ’n boek van my vas te hou.”

- Die Burger