Afrikaanse skrywers op program

Kaapstad

Die Kaapstadse Boekebeurs is van môre tot Maandag in die Kaapstadse Internasionale Konferensiesentrum aan die gang. Soos in vorige jare bied dit ’n internasionale ­program met ’n norring kraampies, ­bekendstellings, besprekings en voor­lesing waarby Afrikaanse skrywers ingereken is.

Wole Soyinka, die eerste Afrika-wenner van die Nobelprys vir ­Letterkunde, is vanjaar ’n gas van die vyfde boekebeurs en sal môre om 10:00 met sy uitgewer Nana ­Ayebia oor sy nuwe memoir, You Must Set Forth at Dawn, gesels.

Die eerste Afrikaanse skrywer op die program is Jeanne Goosen. Sy praat môreoggend om 10:00 oor haar nuwe bundel kortverhale, Plante kan Praat.

Om 11:00 volg ’n gesprek oor landskap en geheue waaraan die Afrikaanse skrywer Odette ­Schoeman deelneem, asook ­Cynthia ­Jele, ­Sally-Ann Murray en Maya Fowler. Mike Nicol sal die gesprek lei.

Die besprekings en bekend­stellings word soos op vorige ­boeke­beurse in tydgleuwe in verskil­lende lokale in die Kiks aangebied.

Só byvoorbeeld kan mense môre om 12:00 kies tussen Freek Robinson se gesprek met Bill Nasson, skrywer van die onlangs ­by­gewerkte The War for South Africa, Quickfox Publishing se aanbieding oor selfpublikasie, asook Tracy Farren se gesprek met Rosie ­Kendal, Jele en Fiona Snyckers oor sogenoemde “chick-lit” en vroue­fiksie.

Om 13:00 praat Dan Sleigh oor sy historiese roman, Afstande, oor die verhaal van die Griekse ­skrywer- soldaat Xenophon.

Elmari Rautenbach, adjunk­redakteur Drum, praat die dag om 14:00 met Rudolph Zinn, senior ­dosent in kriminologie en skrywer van Home Invasion, asook die misdaadskrywers Deon Meyer ­(Karoo­nag), Karin Brynard (Plaasmoord) en Chris Karsten (Abel se Ont­waking). In dieselfde tydgleuf vind ’n bespreking plaas oor P­umla ­Dineo Gqola se boek What’s Slavery To Me?. Adam Haupt, Gabeba Baa­deroon en Meg Samuelson sal oor die postkoloniale slawegeheue ­gesels.

Die veelbesproke koms van e-boeke en die tradisionele boek sal ook om 14:00 onder die loep geneem word wanneer Steven Naude van Pearson en Michelle Lissoos van Thin Ahead Education Solutions gesels. En om 14:00 tree Steven ­Dubin, Sue Williamson, Riason ­Naidoo en ­Andrew Lamprecht in gesprek oor die toekoms van ­museums in Suid-Afrika.

Die skrywers van Growing up in the New South Africa, Jeremy Seekings en Sharlene Swartz, sal dan ook gesels met Crain Soudien, adjunk-visekanselier van die Universiteit van Kaapstad.

Ook op dié dag, van 17:00 tot 18:00, gaan Cas Vos, Joan Hambidge en Daniel Hugo van hul gedigte voorlees.

Sondag om 10:00 en 11:00 gesels Ruda Landman met die wenners van die M-Net- literêre pryse.

Ook om 10:00 gesels die digter Danie ­Marais met Andries Bezuidenhout oor sy rubriekebundel, Toeris in ­Hillbrow.

Om 13:00 gesels Johann ­Myburgh, ’n omroeper van Radio ­Helder­berg, met drie skrywers oor Afrika: Deon Maas (Witboy in ­Afrika), Christiaan ­Bakkes ­(Stoffel in Afrika) en Piet van ­Rooyen ­(Etosha).

Die dag om 15:00 en Maandag om 10:00 stel Hugo sy Afrikaanse ver­taling uit ­Nederlands van Koning van Katoren bekend. Die jeug­romanskrywer Carina Diedericks-Hugo sal die gesprek lei.

Om 16:00 tot 17:00 die dag lees die digters ­Louis Esterhuizen, Jelleke ­Wierenga, Zandra Bezuidenhout en Melt Myburgh gedigte voor.

Maandag om 09:30 sal die kinder­boekillu­streerder Marjorie van Heerden die jongklomp wys hoe hulle vorms kan gebruik om fantastiese tekeninge te maak. En om 10:00 stel Keina Swart die boek Hoekom Praat Grootmense so Snaaks? ­bekend.

Die boekebeurs is môre en ­Sondag van 10:00 tot 18:00 oop en Maandag van 10:00 tot 16:00. Volwassenes betaal R60 per dag. ­Studente en ­pensioentrekkers ­be­taal R25. Kinders jonger as 13 jaar kry gratis ­toegang.

Verwante geleenthede word in The Book Lounge in Roelandstraat, Lobby Books in Spinstraat, die ­Labia-bioskope in Oranjestraat en by die SA Nasionale Kunsmuseum in die Tuine aangebied.

- Die Burger