Zuma verdedig Malema

Johannesburg – President Jacob Zuma het Julius Malema, die president van die ANC-jeugliga, verdedig in ‘n onderhoud waarin hy gesê het dat Malema "leierskapskwaliteite het en omgee vir die mense."

“Ek het nie gesê dat hy reg is nie, maar ek sê dat hy ‘n reg het om kwessies uit te lig. As ons Malema keer kan jy sê dat apartheid teruggekeer het,” het Zuma aan die Mail&Guardian gesê.

Mense moet onderskei tussen persoonlike sienings en beleid, en nie Malema of Zuma kan sy eie beleid verklaar nie, het hy gesê in verwysing na Malema se aanhoudende volharding dat myne genasionaliseer moet word.

Malema staar tans aanklagte van haatspraak in die gesig wat by die Suid-Afrikaanse Menseregtekommissie aangemeld is nadat hy die slagspreek “skiet die boere, hulle is verkragters”, by die Universiteit van Johannesburg gebruik het.

“Mense wil hê ons moet hom afpraat. Hoekom moet ons dit doen? Selfs die voormalige jeugliga-leier, Peter Mokaba, het altyd gesing ‘Een boer. Een koeël’. Selfs Madiba, wat vandag ‘n ikoon is, was een van die mees uitgesproke jeugliga-leiers.”

Malema wag nog vir ‘n uitspraak van die gelykheidshof op ‘n aanklag van haatspraak oor kommentaar wat hy gelewer het oor die vrou wat Zuma in die hof laat verskyn het vir verkragting.

Malema het ook by die onlangse opening van ‘n kerk in Limpopo, waarvoor hy geld ingesamel het, gewys dat “daar ‘n leier in hom is vir die toekoms, ‘n man wat omgee vir mense en wat inisiatief kan neem.

“Julius is nie ‘n probleem nie. Mense kan nie dieselfde styl hê nie. Daar is nie vir ons ‘n krisis nie.”

Zuma het bygevoeg dat die voormalige jeugliga-president, Fikile Mbalula, wat nou adjunk-minister van polisie is, stilgeraak het.

“Mbalula was ‘n tyd terug baie uitgesproke, maar mens hoor nie meer van hom nie. Ons besigheid is om hulle te help om volwasse te word.”

- Sapa