Zuma smee bande met Bultfontein se boere

Bultfontein

Pres. Jacob Zuma het nou self ’n aandeel in ’n Vrystaatse boerdery en gaan gereeld op die Boertjiefees kom kuier.

Sy nuwe versie en stoet-Bonsmara-bul met ’n mooi Zoeloe-naam moet die versies hier dek. Die hoop is dat ’n ryk oes kalwers simbolies sal wees van die verbintenis tussen hom en dié gemeenskap.

Zuma het gesê hy wil elke Boertjiefees bywoon en dan bly “vir boertjiekos, vir pap en vleis”. Hy is ook genooi vir die jaarlikse “fly inn” waar vlieëniers na die dorp vlieg vir ’n ontbyt.

Hy het sy besoek aan KwaZulu-Natal onderbreek en per lug­maghelikopter na die dorp gevlieg om die Boertjie-kontreifees te open.

“Dit is vir my vandag belangrik om opregte mense te ontmoet wat dinge laat gebeur. Julle boere is sulke mense,” het hy gesê aan dié boere, wat na die swart gemeenskap uitgereik het.

Die land kan by die boere kom leer – hulle kla nie, maar doen dinge en help om voedselsekuriteit te verseker, het hy gesê.

Met die ontvangs van sy Bonsmara-bul van R40?000 het hy die bul die naam Nsuze gegee, ’n rivier wat deur sy stat Nkhandla vloei.

Die bul is deur mnr. Jan Pienaar van die plaas Koppieland geskenk. “Dit is beter om hande te vat as om te boks. Dis ’n groot voorreg,” het Pienaar gesê.

Mnr. Herman Meiring, voorsitter van Bultfontein-Landbou, het gesê die president is welkom om jong mans van sy stat te stuur om hier opgelei te word.

“Hy is nou deel van die projek. Ons wil ’n verskil maak en ons gáán ’n verskil maak. Hy is nou deel van Bultfontein. Hy het vir ons gesê hy wíl deel wees daarvan (die projek).”

Meiring het, net nadat Zuma se bul oorhandig is, die president om die skouer gevat en hom indringend toegespreek.

“Die versies en die bul wat ons geskenk het – 15 versies plus ons as Bultfontein-Landbou het ook ’n versie – bly hier by ons.

“Iemand wat graag wil boer, moet gekeur word. Hy moet ’n landbou-agtergrond hê. Dan word hy by die munisipaliteit se meent, waar die bul en versies gaan loop, opgelei.”

Bonsmara SA gaan deel word van die projek om die boere op te lei.

Die boere gaan lusern by die? rioolaanleg vestig en die nuweling-boere hierin oplei.

Meiring het gesê die gemeenskap pluk met Zuma se besoek die vrugte van harde werk. Premier Ace Magashule van die Vrystaat het dié gemeenskap as ’n rolmodel vir die hele land bestempel en dit is hoekom hy die president hierheen genooi het.

“Die premier en LUR’e se deure en harte is oop. Ek wil dankie sê dat hulle dit betoon en omdat hy (Magashule) uit sy kantoor pres. Zuma gebel en hierheen genooi het. Hy het gekom. Dit wat hy gesê het, het gebeur. Die versieprojek se simboliek is ons wil saamwerk, hulle wil saamwerk, ons kyk na hul belange en ons kan mense oplei.”

- Die Burger