Zuma se besluit oor Simelane onbehoorlik

Pretoria

Pres. Jacob Zuma kon nie ’n swakker keuse gemaak het toe hy adv. Menzi Simelane as nasionale direkteur van openbare vervolging (NDOV) aangestel het nie.

Daar is talle uitstekende advokate wat geskik is vir dié pos, het me. Helen Zille, DA-leier, gister buite die Noord-Gautengse hooggeregshof hier gesê nadat sy namens haar party ’n hofaansoek vir die hersiening van Simelane se aanstelling ingedien het. Die aansoek word in April aangehoor.

Sy het gesê die groot probleem is dat Simelane klaarblyklik nie die onafhanklikheid van die na­sionale vervolgingsgesag (NVG) erken nie. “Dié onafhanklikheid is absoluut wesenlik in die konstitusionele bestel.”

Dit was ’n onbehoorlike besluit om hom aan te stel en die DA se hof­aansoek is “baie sterk in die reg gefundeer”, het sy gesê.

Luidens talle ander politieke partye se mediaverklarings ondersteun hulle volgens Zille die hofaansoek. Sy glo daar is “talle mense in die ANC” wat dit ook ondersteun.

Sy vind dit ironies dat adv. Vusi Pikoli as NDOV afgedank is al het die Ginwala-kommissie hom geskik bevind vir dié pos, en dat Simelane, wat deur die kommissie as ’n onbetroubare getuie bestempel is, aangestel is.

Volgens die DA word die grondwetlikheid en regmatigheid van Simelane se aanstelling in die hof betwis omdat Zuma daarmee buite sy magte opgetree het.

Daar is goeie rede om te vermoed hy het die besluit geneem met die uitsluitlike doel om magtige ANC-leiers, wat homself insluit, teen vervolging te beskerm, sê die DA.

Die party sê getuienis voor die Ginwala-kommissie toon Simelane voldoen nie aan die wetlike kriteria vir die pos nie.

Hy het voor die kommissie verskeie stellings gemaak wat toon hy verstaan of respekteer nie die NVG se onafhanklikheid nie. Dit sluit in:

 - dat hy gesê het die NDOV is aanspreeklik teenoor die direkteur-generaal (DG) van justisie;

 - sy argument dat Pikoli nie geskik vir die pos was nie omdat dié geweier het om aan ’n DG verslag te doen;

 - Simelane het betwis dat die Grondwet die NVG se onafhanklikheid waarborg; en

 - hy glo die minister van justisie moet bepaal of ’n spesifieke vervolging in openbare belang is.

Die DA sê dit het aan die lig gekom dat Simelane namens die oudminister van justisie, me. Brigitte Mabandla, die opdrag opgestel het om Pikoli se vervolging van die destydse polisiehoof, mnr. Jackie Selebi, stop te sit.

- Volksblad