Zuma-lyfwagte betas joernalis glo onsedelik

Johannesburg

Lyfwagte van pres. Jacob Zuma het ’n buitelandse joernalis hardhandig rondgepluk en haar glo onsedelik betas.

Emma Hurd, Afrika-korrespondent van SkyNews, het gister aan Die Burger vertel hoe sy op 18 Maart verlede jaar in Mafikeng tydens ’n verkiesingsaamtrek deur lyfwagte van Zuma eers teen die grond gedwing is en hoe een na haar borste gegryp het.

Hurd meen sy het eers ’n jaar ná die voorval gevoel sy moet daaroor praat omdat dit blyk dié soort hantering van joernaliste word nou die norm onder Zuma se lyfwagte.

’n Eyewitness News-joernalis is vroeër die week by die Chris Hani-Baragwanath-hospitaal in Soweto hardhandig hanteer en gedwing om beeldmateriaal uit te vee, terwyl ’n kadetverslaggewer en fotograaf van Mail & Guardian Woensdag glo in hul eie motor voor Zuma se huis in Forest Town, Johannesburg, aangehou is.

“Dit is bisar wat met my gebeur het, en dit gebeur al hoe meer,” het Hurd gesê.

Sy is egter nie seker of die lyfwagte wat haar betas en rondgepluk het van die polisie se BBP-eenheid of die ANC se eie lyfwagte was nie.

Hurd het nie ’n klag by die polisie aanhangig gemaak nie.

Sy het wel mnr. Steyn Speed, ANC-woordvoerder, hieroor gekontak.

Speed het verlede jaar in ’n e-pos verskoning gevra vir dié soort optrede en beloof om dit te ondersoek.

Hurd het dit daarna nie weer opgevolg nie en ook nie weer van die ANC gehoor nie.

- Die Burger