‘Zuma behoort SA eerste te stel’

Kaapstad

Werkskepping, onderwys, duidelikheid oor die beplande nasionale gesondheidsversekeringsplan (NGV) en plig voor sy eie plesier is van die kwessies waaraan pres. Jacob Zuma môre in sy staatsrede aandag moet gee.

Dít is die gevoel bykans reg oor die politieke spektrum.

Me. Patricia de Lille, OD-leier, het gesê: “Die wittebrood is nou verby vir pres. Zuma. Suid-Afrika benodig ’n president wat sy onverdeelde aandag gee om te verseker dat die land suksesvol kan wees, eerder as een wie se eie plesier al sy tyd in beslag neem.”

Twintig jaar ná die vrylating van oudpres. Nelson Mandela het die land ’n verandering aan die onderwysbeleid nodig om die skaars vaardighede te bekom wat die ekonomie vereis.

Mnr. Athol Trollip, die DA se parlementêre leier, het gesê Zuma het misluk om sy belofte van 500 000 werkgeleenthede teen die einde van verlede jaar gestand te doen.

“Nou moet hy sy jongste belofte van 4 miljoen werkgeleenthede teen 2014 in fyner besonderhede verduidelik.”

Trollip wil ook ’n omvattende aksieplan sien oor hoe die regering dienslewering gaan verbeter en vermorste uitgawes gaan besnoei.

Eerw. Mvumi Dandala, Cope se parlementêre leier, het by monde van sy woordvoerder, mnr. Onkgopotse JJ Tabane, gesê Zuma moet sy standpunt oor verantwoordbaarheid duidelik uitstippel.

“Dit sluit sy eie verantwoordbaarheid in. Die president het in Julie verlede jaar gesê ministers gaan prestasiekontrakte onderteken. Sover ons weet, is dit nooit gedoen nie. Indien dit bestaan, wil ons ook weet wat daarin staan oor kwessies soos armoedeverligting en dienslewering.”

Die vakverbond Cosatu het daarop aangedring dat Zuma dié keer verder as ’n blote verklaring van voornemens gaan en verantwoording doen oor die vordering wat gemaak is met die uitvoering van die regering se beloftes en planne om struikelblokke te verwyder.

Mnr. Patrick Craven, Cosatu-woordvoerder, het gesê hulle wil onder meer ’n herbevestiging hê van die regering se verbintenis tot die NGV. Hulle wil ook hoor watter praktiese stappe gedoen is om landelike ontwikkeling en grondhervorming te versnel en voedselsekerheid te verseker.

Daarbenewens moet die president planne bekend maak oor misdaadvoorkoming en die bestryding van korrupsie.

- Die Burger