Woelige walvisse baljaar nou weer vir ’n vale
2010-09-03 01:24
- Artikelopsies
- Deel
- Kry Die Burger op
Kaapstad
By Hermanus baljaar daar 72 walvisse in die baai, by Witsand kan ’n mens op ’n sonnige dag glo 75 van dié knewels sien en in Valsbaai is daar tientalle die afgelope twee weke gewaar.
“Dit is nou behoorlik walvistyd,” het me. Storm Kreusch, bestuurder van die Hermanus-toerismekantoor, Woensdag gesê. Sy verwag nog walvisse sal in September en Oktober in dié dorp se water kom baljaar.
“As die weer mooi is, kom hulle tot so naby as 10 m van die kuslyn,” het sy gesê. “As die weer sleg is, bly hulle verder weg omdat die water onstuimig is. Dit is ook makliker om hulle te sien as die water glad is, en om hulle te sien blaas as die wind nie waai nie.”
Walvisse is ook volop op dié plekke:
- “Sowat 40% van die wêreld se suidelike noordkapers kom hierheen om te kalf,” het mnr. Justin Boshoff, bestuurder van die De Hoop-natuurreservaat, gesê. Koppie Alleen is die beste plek om walvisse te sien. Toegang is R30 per persoon en R15 vir kinders.
- “Ek het hierdie naweek minstens 40 gesien,” het me. Laritha Pretorius van die toerismekantoor in Witsand gesê. Een van die beste uitkykpunte is vanuit die Anchorage Beach-restaurant.
- “Hier in Gansbaai is baie walvisse,” het me. Doulene Els van die toerismekantoor gesê. “Op mooiweersdae is die beste plek om walvisse te gaan soek by die uitkykpunt in Cliff-weg by De Kelders enPearly Beach.”
- Altesaam 123 walvisse is in Augustus in Valsbaai gesien en op die databank van A Whale of A Heritage Route aangemeld. Mnr. Alan Lindner, wat dié databank begin het, het gesê mense het ’n goeie kans om walvisse te sien van Boyes-rylaan in Muizenberg tot by Smitswinkelbaai.
- Ook in Kleinmond, St. Helenabaai, Stilbaai en in Tafelbaai gewaar mense van tyd tot tyd walvisse.
- Die Burger