Werkplan ‘sal ANC knou’

Kaapstad - Die voorgestelde wysigings aan die Wet op Gelyke Indiensneming kan die nuwe ANC-bestuur se verkiesingsveldtog in die Wes-Kaap ontspoor nog voor hy stoom opgetel het, het kenners gesê.

’n Herrie het losgebars oor voorgestelde wysigings aan die wet, wat onder meer bepaal dat die nasionale demografiese syfers vir aanstellings in die werkplek gebruik moet word eerder as provinsiale syfers.

Die DA het die voorgestelde wysiging as absoluut verregaande bestempel en Cosatu en die ANC in die Wes-Kaap het gemaan teen “swartgevaar-taktieke” kort voor die verkiesing.

Die vakbond Solidariteit se navorsing het gewys nagenoeg ’n miljoen bruin mense sal glo na raming hierdeur hul werk verloor sou dié wysigings deurgaan.

Mnr. Allan Winde, provinsiale minister van finansies, het verlede jaar gesê 21,8% van die totale werkende bevolking in die Wes-Kaap is werkloos.

“Dit is absoluut verregaande, want dit gaan tot meer werkverliese lei. Die president praat van meer werkskepping en dan word daar kwotastelsels voorgestel.

“Ons moet ophou praat van werkskepping en iets begin doen eerder as om wetgewing op te stel wat die omgekeerde doen.”

Me. Helen Zille, Wes-Kaapse premier, het Vrydag in haar openingsrede in die provinsiale parlement ook werkskepping en ekonomiese groei as die hoofprioriteite van die DA-regering uitgewys.

Volgens kenners is die voorgestelde wysigings die regte skietgoed vir die DA in die komende verkiesings.

Prof. Dirk Kotzé, ’n politieke ontleder verbonde aan Unisa, het gesê dié wysigings is ’n groot terugslag vir die ANC in die Wes-Kaap.

“In die res van die land wil die ANC hiermee ’n sterk boodskap oor werksgeleenthede vir swart mense uitstuur, maar dit is tot nadeel van die Wes-Kaap.”

Volgens Kotzé word daar ook geargumenteer die ANC wil juis op die lang termyn die demografie van die Wes-Kaap so verander deur meer swart mense na die provinsie te laat kom.

Mnr. Daniel Silke, ’n onafhanklike ontleder, het gesê dié voorgestelde wysigings kon, met die verkiesing op hande, nie op ’n slegter tyd vir die ANC hier gekom het nie.

“Die DA gaan dié wetgewing gebruik om bestaande kommer onder bruin mense wat voel hulle trek steeds aan die kortste ent, uit te lig.”

Silke het voorts gesê dié wetgewing gaan ernstige politieke gevolge inhou.

“Dit gaan mense verdeel. Dit gaan ammunisie wees vir die DA en elke teen-ANC-mag en uiteindelik die ANC se pogings om die Wes-Kaap terug te wen, kniehalter.”

Silke het gesê Cosatu gaan ook met ’n dilemma sit, want die Cosatu-leierskorps en gewone Cosatu-lede is nie noodwendig altyd in pas met mekaar oor brood-en-botterkwessies nie.

“Indien die ANC nie slaag om minderhede ook ingesluit te laat voel nie, kan hy geloofwaardigheid verloor onder die einste mense wat hy na vry. Kiesers sal die ANC uiteindelik oordeel aan hoe inklusief hy is.”

- Die Burger