Vrou se oorlewing ná sweeftuigongeluk is ’n wonderwerk, sê kenner
2010-03-10 01:04
- Artikelopsies
- Deel
- Kry Die Burger op
Stellenbosch - Dis ’n wonderwerk dat sy lewe.
Só het mnr. Marcel Viljoen, president van die Worcester-vliegklub, gister gesê nadat mev. Adri Hepburn Maandag langs die Breërivier naby Worcester gevind is.
Sy en haar man, Adriaan, het Sondag met ’n sweeftuig buite die dorp neergestort.
Mnr. Hepburn is in die voorval dood.
Die wrakstukke van die gemotoriseerde tweesitplek- Lambada-sweeftuig is Maandag omstreeks 16:00 sowat 500 m stroomaf van die Kwaggakloofdam gevind.
Daar word vermoed dat die sweeftuig kragdrade getref het.
Mnr. Hepburn se lyk was nog in die sweeftuigwrak vasgegordel.
Sy ernstig beseerde vrou is sowat 60 m van die wrakstukke gevind.
Sy het met ’n gebreekte voet en neus in die hitte van sowat 41°C tussen die bosse deurgekruip in ’n poging om hulp te gaan soek.
Me. Suné Kilian, woordvoerder van die Worcester Medi-Clinic, waar Hepburn met veelvuldige beserings opgeneem is, het gesê dit gaan fisiek goed met haar.
“Emosioneel gaan dit nie so goed nie, maar ons is tevrede met haar fisieke toestand.
“Sy is Maandagaand na die teater. Sy het veelvuldige beserings opgedoen en sal moontlik later weer na die teater geneem word,” het Kilian gesê.
Sy het nie besonderhede gegee oor Hepburn se beserings nie.
’n Bron wat op die ongelukstoneel was, het Maandag aan Die Burger gesê Hepburn is onder meer met ’n gebreekte voet en neus en pelvisbeserings per helikopter na die Medi-Clinic gebring.
Volgens die polisie se inligting is die egpaar van Zimbabwe en is hulle die naweek Worcester toe om te vlieg.
Viljoen het gister gesê die wrak is nog nie verwyder nie.
“Die polisie het gebel en gevra of dit (die wrak) verwyder kan word, maar ons het gevra of Burgerlugvaart eers ondersoek kan instel,” het Viljoen bygevoeg.
Hy het vervolg hy kan nie glo mev. Hepburn het die voorval oorleef nie.
“As ’n mens haar beserings in ag neem en die klein opening sien waardeur sy moes gekruip het om uit die wrak te kom, is dit ’n wonder sy het oorleef.”
- Die Burger