Voorste regisseurs en skrywers vereer by Woordfees
2010-03-08 00:11
- Artikelopsies
- Deel
- Kry Die Burger op
Stellenbosch.– Die Universiteit van Stellenbosch se Woordfees het vir die eerste keer in sy 11-jarige bestaan woord- en visuele kunstenaars vereer.
Die WOORDtroFEES is gister, op die laaste dag van die fees, in samewerking met die ATKV toegeken.
Die prys Woorde Open Wêrelde (WOW) vir ’n skool se uitsonderlike bydrae tot Afrikaans het aan die Sekondêre Skool Schoonspruit gegaan en die individuele prys aan me. Mary Wanda.
Die eerste prys vir ’n drama is toegeken aan As Die Broek Pas. Dié werk is deur Willem Anker vertaal. Marthinus Basson het die regie en ontwerp gedoen en Antoinette Kellermann is in die hoofrol.
Die drama-naaswenner is Willem Anker se Skrapnel, onder regie van Jaco Bouwer, wat ook die ontwerp behartig het.
In die kategorie vir klassieke musiek het 100 Jaar van die Afrikaanse Liedkuns die eerste prys opgeraap. Nuwe Woorde word Nuwe Liedere is die naaswenner.
Die produksie Verse in My Vingers – Breyten Breytenbach het die kategorie woordmusiek (kontemporêr en rock) verower. Prente by ’n Uitstalling is die naaswenner.
Richardt Strydom en Jaco Burger – vir “Ad Hominem” – is as hoogstaande visuele kunstenaars vereer, met Diane Victor in die tweede plek.
Karin Brynard en Bettina Wyngaard deel die toekenning vir die debuut-teksskrywer.
Hennie Aucamp het die eerste prys as woordkunstenaar verower, terwyl Eben Venter en Anker die tweede plek deel. – Boland-kantoor
- Die Burger