Vliegtuig vlieg in berg vas
2009-12-29 00:51
- Artikelopsies
- Deel
- Kry Die Burger op
Elise Tempelhoff & Vicüs Bürger
’n Mediese spesialis van Vereeniging en drie lede van sy gesin is gister dood toe hul ligte vliegtuig in die Oos-Vrystaat teen ’n berg vasgevlieg het.
Dr. Johan Adriaan Venter (61), ’n ortodontis, sy vrou, Elzabé (61), hul seun, mnr. Christiaan Venter, en sy vrou, Christine (albei 29 en albei geoktrooieerde rekenmeesters), was vroeg gistermiddag in ’n Beechcraft Bonanza-vliegtuig van Vereeniging na Margate onderweg toe hulle in slegte weer teen Platberg by Harrismith vasgevlieg het.
’n Verslae mnr. Wilhelm Venter, oudste seun van die Venter-egpaar en ook ’n geoktrooieerde rekenmeester, het gisteraand gesê die dood van sy ouers en sy enigste broer is ’n geweldige slag vir hom en sy vrou, Natasha.
Wilhelm Venter en sy gesin woon in Londen, maar het vir die feestyd Suid-Afrika toe gekom om hul dogtertjie, Sophia, hier te laat doop.
“Ons dogtertjie is eergister by ons kerk in Vereeniging gedoop. Sophia was my ouers se eerste kleinkind. Hulle was so opgewonde oor haar. Ek het só daarna uitgesien dat hulle haar sien grootword.
“Gister (eergister) was ’n fantastiese dag. Ons was ná die doop almal vir oulaas saam by my ouerhuis. Wat vandag (gister) gebeur het, was seker die ergste einde waaraan ’n mens kan dink.”
Venter het gesê hy en sy gesin was gistermiddag op pad na die O.R. Tambo-lughawe om Kaapstad toe te vlieg vir ’n vakansie in Pringlebaai toe hulle die nuus kry dat sy ouers se vliegtuig vermis word.
“My telefoonnommer was op my ouers se vliegplan. Die lugbeheerbeamptes het my omstreeks drie-uur gebel en gesê die vliegtuig word vermis. Daarna het die nuus al hoe slegter geword. ’n Halfuur later het ek verneem die wrak is gekry. Ek en Natasha het omgedraai en teruggery Vereeniging toe.”
Me. Santjie White van die Suid-Afrikaanse soek-en-reddingsorganisasie (Sasar) sê die vliegtuig het vermoedelik weens tegniese probleme na Harrismith uitgewyk.
Platberg by Harrismith was glo met digte mis bedek en die vliegtuig het dit getref.
Nood- en-reddingswerkers asook die polisie het hulle na die toneel gehaas.
Mnr. Chris Botha van die Net-care 911-nooddiens het gesê paramedici moes weens die bergagtige terrein met veldvoertuie na die toneel vervoer word.
Volgens sers. Mmako Mophiring, polisiewoordvoerder, moes die lyke met toue en draagbare opgelig word.
Die lyke is gelaai in ’n Oryx-helikopter wat vanaf Durban gekom het en is na ’n vliegveld by Harrismith gebring. Hierna is dit na die staatslykhuis in Phuthaditjhaba vervoer.
“Christiaan was my enigste broer,” het Venter gister gesê. Hy het net goeie herinneringe van sy gesin en sê dat hy “ongelooflik trots” op sy ouers en sy broer is. “Ek sal dit vir die res van my lewe aan almal vertel.”
Hy het baie uitgesien na die jare wat voorlê en het gehoop dat sy ouers Sophia sou sien grootword. “Dit het anders uitgewerk, maar ek is baie dankbaar dat hulle haar wel geken het, al was dit net vir ’n rukkie.”
Me. Amanda Minnie, wat reeds 16 jaar as ontvangsdame vir Venter gewerk het, het gister gesê die meeste mense by die spreekkamer was met vakansie, maar het gistermiddag nadat hulle van die ongeluk gehoor het daar byeengekom om mekaar te ondersteun.
’n Geskokte dr. Pieter Grové, ’n tandarts van Vanderbijlpark wat tans in Mpumalanga met vakansie is, het gisteraand gesê daar moes “iewers ’n groot fout gewees het” omdat Venter reeds vir 14 jaar lank vlieg.
Hy was gekwalifiseerd om in slegte weersomstandighede te vlieg. Die vliegtuig waarmee hy gevlieg het, was met die beste instrumente toegerus, het Grové, wat reeds die afgelope 20 jaar ’n kollega van Venter is, gesê.
Mnr. Kabelo Ledwaba, woordvoerder van die Burgerlugvaartowerheid (BLO), het gesê ondersoekers van die BLO is na die toneel.
Venter het gesê die oorledenes sal vermoedelik eers volgende week begrawe word.
- Die Burger