Varsity-rugbykoors vat vlam

STELLENBOSCH. – Rugbykoors het gister hier hoog geloop toe die Maties in hul eerste Varsitybeker-wedstryd van die seisoen teen die Tshwane Universiteit van Tegnologie (TUT) uitgedraf het.

’n See van maroen het net voor sononder op die Danie Cravenstadion by die Coetzenburg-sportterrein toegesak.

Bykans 15000 toeskouers het toegekyk hoe die tuisspan die besoekers met 52-2 afransel.

“Dit gee ’n mens werklik hoendervleis as almal saam hier onder die Pieke staan en die volkslied sing en die kranse sowaar byna antwoord gee,” het Louis Breytenbach, ’n derdejaarstudent, gesê. “Dit maak jou trots om ’n Matie en ’n Suid-Afrikaner te wees.”

Die skare het ontplof elke keer as die maroenspan punte aangeteken het en met die rustydtelling op 26-2 het die atmosfeer ’n hoogtepunt bereik.

Harde musiek en vermaak het gesorg dat toeskouers tydens rustyd in goeie gees bly.

“Almal is verskriklik opgewonde oor die nuwe rugbysei­soen en die atmosfeer is eenvoudig fantasties,” het me. Lily Brannon, Matie-dirigent en tweedejaar-BA-student, gesê.

“Dit sal wonderlik wees as die Maties weer teen die Ikeys in die eindstryd kan speel. Ons gaan alles in ons vermoë doen om hulle met die beste ondersteuning daar te kry.”

Volgens mnr. Belius Potgieter, bestuurder van die Maties-rugbyklub, was daar slegs ’n handvol seisoenkaartjies voor die wedstryd oor.

Vir die groot wedstryde teen die Tukkies en Ikeys is die hoofpaviljoenkaartjies ook reeds uitverkoop.

“Dit is ongelooflik hoe vinnig die kompetisie in ’n kwessie van ’n paar jaar gegroei het,” het Potgieter gesê. “Diegene wat in die vervolg dagkaartjies vir die wedstryde wil koop, sal moet vroeg spring.”

Die Maties speel volgende Maandag teen die Pukke in Potchefstroom.

- Die Burger