Vakbonde wil regering kaalvuis pak oor beleid
2010-02-19 04:44
- Artikelopsies
- Deel
- Kry Die Burger op
Johannesburg
Vakbonde het gister met ’n massastaking gedreig weens die begroting van mnr. Pravin Gordhan, minister van finansies.
Mnr. Irvin Jim, hoofsekretaris van die metaalwerkersunie Numsa, asook mnr. Zwelinzima Vavi, hoofsekretaris van Cosatu, dreig albei met ’n staking voor Oktober.
“Ons gaan die houe nie meer terughou nie. Die handskoene is af en die wittebrood is verby,” het Vavi gedreig.
Volgens Cosatu het die ANC-regering “eensydige gewoontes” en ignoreer hy besluite rondom die ekonomie waaroor Cosatu, die ANC en die SAKP reeds in Oktober verlede jaar op die alliansie-beraad ooreengekom het.
Cosatu sê sy twee miljoen lede en dié van ander vakbondfederasies kan voor Oktober met ’n landwye staking teen werkloosheid en makro-ekonomiese beleid begin.
“Moet ons wag vir die minister om sy mening eers volgende jaar te verander?
“Nee, ons kan nie,” het Vavi gesê.
Volgens hom staan die werklike werkloosheidsyfer op 32% en sal die vakverbond die regering op sy tone en verantwoordbaar hou. Samesprekings met alliansievennote en die regering is nie die enigste oplossing nie.
“Dit blyk as ons vreedsaam (oor ekonomiese beleid) gesels, kies mense wat hulle wil toepas. Dié gesels onder here werk nie.”
Cosatu is bitter teleurgesteld oor Gordhan se aankondiging dat die Reserwebank se inflasieteikens steeds tussen 3% en 6% is.
“Die minister weet daar is nie konsensus oor inflasieteikens nie,” het Vavi gesê.
Hy meen Gordhan is deur amptenare beïnvloed wat reeds in die Mbeki-regering gedien het en die neo-liberalistiese beleid voortsit.
“Regeringsprosesse wag nie vir ons nie en die minister is aan die galop.”
Vavi het egter erken die alliansie se taakspan vir makro-ekonomiese beleid het nog nie vergader sedert daar verlede jaar besluit is om dit tot stand te bring nie.
“Die minister is gelos om self te besluit wat goed en sleg is.”
Vavi is ook krities omdat die ANC volgens hom gewankel het deur nie te verseker dat die Reserwebank se mandaat vergroot en inflasieteikens hersien word nie.