VIDEO: Polisie krap kop oor kitsbank-rooftogte

KAAPSTAD. – Die polisie het gister sy kommer uitgespreek oor die nuwe tendens van kitsbank-rooftogte nadat nog twee kitsbanke opgeblaas is.

Rowers het gisteroggend vroeg met ’n onbekende bedrag geld gevlug nadat hulle twee Absa-kitsbanke in Goodwood opgeblaas het.

Volgens mnr. Albert de Jager, sentrumbestuurder van die Goodwood Mall, het ’n sekerheidswag vroegoggend drie mans in die parkeerterrein opgemerk.

“Drie mans het omstreeks 03:15 in ’n blou BMW hier opgedaag. ’n Wag het hulle genader, maar een outjie het ’n vuurwapen uitgepluk en hom weggejaag.

“Hulle is toe na die bank en later was daar ’n ontploffing. Hulle het met hul buit weggejaag,” het De Jager gesê.

Volgens die polisie is drie gewapende verdagtes met twee houers van die bank weg. Dit is onbekend hoeveel geld gesteel is.

Teen 11:30 gister was al die winkels in die sentrum oop, met slegs ’n paar mense wat die toneel opgeruim het.

Dit is die derde kitsbankrooftog in ’n week en die tweede in die Goodwood-gebied.

’n Kitsbank is verlede Dinsdag in Durbanweg in Bellville opgeblaas en nog een Vrydagoggend in Vasco Boulevard.

Volgens ’n polisiewoordvoerder, oa. November Filander, is dié nuwe tendens van rooftogte kommerwekkend.

Absa wou nie veel kommentaar lewer nie en het slegs gesê dat hulle bewus is van die voorval en dat dit ondersoek word.

De Jager het gesê daar is nie veel wat sekerheidswagte kan doen om sulke rooftogte te keer nie.

“Die mense wat hierdie misdade pleeg, is gewapen. Sekerheidswagte is nie en kan daarom nie misdadigers afskrik nie,” het De Jager gesê.

Die polisie is steeds op soek na die verdagtes.

’n Saak van kwaadwillige of opsetlike beskadiging van eiendom word ondersoek.

 

- Die Burger