VIDEO: Hond leer loop danksy akupunktuur
2011-11-10 00:00
- Artikelopsies
- Deel
- Kry Die Burger op
Kaapstad
Die basterhond Warrior, wat lewend begrawe is, leer weer loop – met die hulp van akupunktuur.
Die storie van die uitgeteerde brakkie het diereliefhebbers aangegryp nadat daar berig is hoe sy op 20 Oktober lewend deur twee skoonmakers van ’n skool in Khayelitsha begrawe is, maar oorleef het.
Die Burger het berig hoe die Mdzananda-kliniek in Khayelitsha gekontak is nadat twee mans by die Sekondêre Skool Luhlaza gewaar is waar hulle besig was om Warrior in ’n vlak graf toe te spit.
Sy is net betyds gered en na die dierekliniek geneem.
’n Ondersoek na dié voorval deur die Wes-Kaapse departement van onderwys het daartoe gelei dat mnr. Manono Makaphela (skoolhoof) en mnr. Mkhumbuzi Mcedana (skoonmaker) vandag van wangedrag aangekla sal word.
Die skool se beheerliggaam is ook versoek om die tweede skoonmaker wat by die voorval betrokke was, aan te kla. Makaphela en Mcedana sal op 18 November ’n voorverhoor moet bywoon.
Warrior se rug is in die voorval op twee plekke erg beseer en haar agterlyf is gedeeltelik verlam.
Onder die wakende oog van ’n veearts, dr. Barry Hindmarch, en sy akupunktuur-naalde het Warrior gister haar derde behandeling ontvang. “Ons sien klaar ’n verbetering in haar ruggraat-reflekse en regtervoet,” aldus Hindmarch.
Hy gebruik al twintig jaar lank akupunktuur-naalde en alternatiewe medisyne om honde soos Warrior te genees.
“Ons gebruik akupunktuur om die senuweepulse te stimuleer en so spiermassa te verbeter.”
Die arts het bygevoeg dis onmoontlik om te sê of Warrior ooit volkome sal genees. “Maar een ding is seker, sy is ’n ongelooflike vegter.”
Intussen stap die personeel van die Mdzananda-kliniek elke dag met haar in ’n spesiale harnas sodat sy oefening kan kry.
- Die Burger