VIDEO: Groot avontuur wink vir tiener

KAAPSTAD

’n Tiener van die Moederstad gaan dalk saam met die bekende avonturier en ontdekkingsreisiger Mike Horn op ’n ekspedisie gaan.

Louise Louw(15), ’n gr.11-leerder van Vredehoek in Kaapstad en leerder aan die Hoërskool Jan van Riebeeck, vertrek op 29Januarie na Château d’Oex, Switserland, vir die Jong Avonturier-kamp wat deur Horn gestig is.

Van die 18jong mense wat die kamp bywoon, sal ses tot tien gekies word om saam met Horn na die Amasone te reis.

“Ek is baie opgewonde oor die kamp. Ek sien veral uit na al die sneeu. Wie anders in Suid-Afrika sal sneeu in Februarie sien?” het Louw gesê.

Sy is een van ’n groep jong mense van reg oor die wêreld wat vir tiendae tussen die sneeu en gletsers sal stap, rotse sal klim en verskeie groen bewusmakingsprojekte sal aanpak.

“My broer was twee jaar gelede ook op die kamp. Ek het nou ’n goeie idee wat om te verwag,” het sy gesê.

Sy is ’n groot natuurliefhebber en opgeleide menseredder.

Louw draf daagliks 5km en swem 3km as deel van haar voorbereiding vir die kamp.

“Die instrukteurs van die kamp wil sien dat jy sport beoefen. Jy moet ’n liefde vir die natuur en vir mense hê en jy moet bereid wees om te leer.”

Horn sal nie self die avontuurkamp bywoon nie, aangesien hy tans met sy eie ontdekkingsreis besig is.

Volgens Louise se ma, me. Annetjie Louw, is sý die een wat vir termiese sokkies en stapskoene moes rondry.

“Dit is ’n ongelooflike ondervinding en ek is baie bly vir haar, veral omdat die keuring so streng is,” het sy bygevoeg.

- Die Burger