Twee mense verkool in bakkie

Johannesburg -  Twee mense het Donderdag op die R61 in die Oos-Kaap verkool nadat hulle bakkie waarin hulle gery het, aan die brand geslaan het.

Die bakkie het teen die agterkant van ‘n minibus-taxi gebots en kort daarna aan die brand geslaan, het die Oos-Kaapse verkeersdepartement gesê.

Tshepo Machea, ’n woordvoerder van die departement het gesê die ongeluk het omstreeks 08:00 Donderdagoggend tussen Flagstone en Lusikisiki plaasgevind.

Beide voertuie het weens die impak van die botsing aan die brand geslaan.

“Die twee insittendes van die bakkie het so erg gebrand dat niemand hulle sal kan uitken nie,” het
Machea gesê.

"Brandbestryders is steeds besig om vlamme te blus en ons is nog nie seker hoeveel mense in die taxi ook verbrand het nie.”

Sommige van die oorlewendes is na die Saint Elizabeth-hospitaal geneem.

“Ons doen ‘n beroep op motoriste om hulle ligte aan te skakel weens die digte mis en reën.

-Sapa