Toelae van R64 miljoen ‘op onreëlmatige wyse verspil'

Kaapstad. – Miljoene rande se bedrog en finansiële onreëlmatighede by die Suid-Afrikaanse agentskap vir maatskaplike sekerheid (Sassa) aangeteken terwyl arm landsburgers honger ly.

Sassa is die eenheid binne die departement maatskaplike ontwikkeling wat toelae aan hulpbehoewendes moet uitbetaal.

Me. Patricia Kopane, DA-woordvoerder oor maatskaplike ontwikkeling, het gesê Sassa se voorlegging aan die portefeuljekomitee verlede week het gewys R64 miljoen is in die 2007-’08-boekjaar onreëlmatig verspil. Volgens Kopane het bykans 1 000 werknemers skulderkennings betaal vir geld wat hulle verduister het. Dit beloop meer as R50 miljoen.

Mnr. Fezile Makiwane, uitvoerende hoof van Sassa, is vroeër vanjaar op spesiale verlof geplaas hangende ’n ondersoek na beweerde finansiële wanbestuur. Kopane het gesê daar was in 2007 reeds 60 000 dormante bankrekeninge by Standard Bank en Absa waarin toelaes betaal word en 39 000 het nog nie dié geld kom opeis nie.

Daar is 250 000 bankrekeninge waarvan die besonderhede van die rekeninghouer verkeerd aangeteken is. Altesaam 10% van die 39 000 wat nie hul toelae kom opeis het nie, is reeds dood. Mnr. Paseka Letsatsi, woordvoerder van Sassa, het gesê hy kan eers vandag kommentaar lewer.

- Die Burger