Teëspoed vir US-projek
2012-02-24 00:00
- Artikelopsies
- Deel
- Kry Die Burger op
ANTARKTIKA. – Die Maties se projek om groen krag in Antarktika te installeer, het die wind van voor gekry.
Drie lede van die projekspan het met die hulp van die oornamespan een van drie van hul windkragtorings opgerig.
Dit het omtrent twee weke lank krag aan die basis gelewer voordat ’n kwaai windstorm dit getref het.
“Die wind het gemiddeld 130km/h gewaai en daar was rukwinde van tot 160km/h,” het mnr. Will Esterhuyse, die projekspanleier, verduidelik.
“Die boute waarmee die lemme aan die struktuur vasgemaak is, het weens die vibrasies losgewikkel. Die lemme het losgekom en die neus het afgeval en weggewaai.”
Die lemme is beskadig en is om veiligheidsredes afgehaal. Hulle gaan op Stellenbosch herstel en teruggeneem word na Antarktika, het mnr. Ulwin Hoffmann gesê. Hy is besig met sy meestersgraad in ingenieurswese en het die beheerstelsel vir die turbine ontwikkel.
’n Ander spanlid, mnr. Fred Fourie, het die neus sowat twee weke ná die windstorm ongeveer 10km van die basis af opgetel.
Die projekspan sal deur die loop van die jaar kinkels uitstryk en die stelsel weer einde vanjaar aan die gang kry wanneer hulle na Antarktika terugkeer.
Wanneer die stelsel volledig in werking is, sal dit 45kW genereer. Die basis gebruik gemiddeld 60kW.
“Die doel is om fossielbrandstofverbruik by die basis te verminder, nie om dit te vervang nie,” het Hoffmann verduidelik.
“Indien die diesel-kragopwekkers vervang word, sal daar byvoorbeeld ander hittebronne nodig wees om die basis te verhit.”
Daarom is dit nou beter om die stelsel kleiner te hou, anders sal die basis herontwerp moet word om by die stelsel aan te pas.
Diesel is volgens hom nie omgewingsvriendelik of energiedoeltreffend nie, en dit is duur. Wind is gratis, energiedoeltreffend en in oorvloed in Antarktika beskikbaar, al is dit soms te sterk.
’n Windkragstelsel wat in Antarktika werk, sal enige plek ter wêreld werk, het Esterhuysen bygevoeg.
Studente en personeel van die Universiteit Stellenbosch se fakulteit ingenieurswese werk al sedert 2001 om ’n windkragstelsel by Sanae IV, Suid-Afrika se basis in Antarktika, te installeer.
Die jongste ontwikkeling het in 2007 begin.
- Die Burger