Stelsel vir eiendom in stad sukkel nog
2012-02-04 03:00
- Artikelopsies
- Deel
- Kry Die Burger op
KAAPSTAD. – Die Kaapse stadsraad se nuwe stelsel om ’n eenvormige databasis vir die 890000 eiendomme in die Moederstad in te stel, veroorsaak steeds probleme wanneer eiendomme na nuwe eienaars oorgedra word.
Die nuwe stelsel is einde November ingestel. Een van die administratiewe prosesse wat sedertdien verander het, is die stelsel om klaringsertifikate van eiendom vir belastingdoeleindes uit te reik.
Mnr. Ian Neilson, onderburgemeester van Kaapstad, het gesê die nuwe stelsel sal uiteindelik beteken dat aansoeke om klaringsertifikate doeltreffender hanteer sal word. Daar is egter onvoorsiene tegniese probleme met die oorgang na die nuwe stelsel by die munisipaliteit én met die elektroniese stelsels wat prokureurs gebruik om eiendomsoordragte te doen.
Neilson het gesê munisipale amptenare werk oortyd om die stelsel reg te kry en die agterstand in te haal wat sedert November ontstaan het.
“Ons het in Januarie goed gevorder en hanteer nou dieselfde aantal aansoeke as wat daagliks ontvang word. Dit is meer as 300 aansoeke daagliks.”
Die stadsraad het in Januarie vir 73% van die aansoeke betalingskedules uitgewerk waar die verkopers van eiendom eers hul munisipale belastings moes betaal alvorens finale klaringsertifikate uitgereik kan word. Daar is in Januarie 5142 aansoeke ingedien.
Neilson het gesê die stadsraad se standaard is om betalingskedules binne vyf dae uit te reik nadat ’n aansoek ingedien is. Verder is daar ’n teiken dat belastingklaringsertifikate binne tien werksdae uitgereik word nadat die nodige betalings ontvang en dokumentasie ingedien is.
- Die Burger