Stellies se sangers bly bobaas

KAAPSTAD. – Daar is gister van vroegoggend tot laatmiddag vinnig gehardloop, ver gegooi en gesing en geskree by die 18de MTBS-interskole-atletiekbyeenkoms in die Bellville-stadion.

Die hoërskole Stellenberg en D.F. Malan het vanjaar weer onderskeidelik met die sang- en atletiekbekers weggestap.

“Dis my eerste MTBS en almal was indrukwekkend. Bellville se liedjies en flashes het veral mooi by hul tema (Amazing Race) gepas,” het me. Alida Zandberg van Eversdal gister gesê.

Honderde ouers, talle nog in werksdrag, en ondersteuners het die rant oorkant die paviljoen vol gesit. Ander toeskouers het op die balkonne van nabygeleë geboue gestaan en kyk.

Die Hoërskool D.F. Malan het die krete begin met hul Spaanse fiësta. Daar was swaaiende heupe, vuurwerk en ’n bul wat hardloop.

Die Hoërskool Stellenberg se Under Construction-tema het gesorg vir stootskrapers, kruiwaens en gumboot-danse.

“Die kinders het baie hard geoefen en elke dag moeg huis toe gekom,” het me. Trudie Jordaan van Welgemoed gesê.

Volgens Jordaan was dinge in die huis maar gespanne voor gister. “Ek het ’n seun in D.F. en een in Tygerberg,” het sy vertel. Volgens haar man, George, het hulle beurte geneem om vir dié twee te skree.

“Ek het egter ’n klein bietjie harder vir die Tiere geskree, omdat dit my seun se laaste skooljaar is,” het sy bygevoeg.

Bekende liedjies soos dié van Pink Floyd en Ricky Martin het gister nuwe lewe gekry.

Die Hoërskool Tygerberg se Safari-Afrika-tema het ook gesorg vir allerhande bosgeluide, soos krieke wat kriek en apies wat skree.

Met die Hoërskool Bellville se Amazing Race-tema is ’n draai gemaak in Egipte, is Asië besoek vir ’n bietjie kung-fu-gevegskuns en is ’n gondelrit in Venesië meegemaak.

Wat die aksie op die baan betref, het D.F. Malan weer geseëvier. Morné Moolman (gr.12) het uitgeblink met ’n allemintige gooi van 69,88m in die spiesgooinommer. Anneline Gerstner, ook in matriek by D.F Malan, was die top-meisiesatleet nadat sy die diskus 38,58m ver gewerp het.

• Nog berigte en foto’s in Maandag se Jip.

Kry hier al die aksie
’n Webruimte waar al die aksie van die MTBS-atletiekfees gesien kan word, is nou beskikbaar.
Gaan kyk na volledige videogrepe van al vier skole se krete, lees meer oor die byeenkoms, stem vir jou gunsteling-span en bespreek dit met jou vriende op Facebook.
KLIEK HIER om deel te neem.

Nog inligting is op ons gratis iPad-toepassing beskikbaar.

- Die Burger