Staat ‘het sterk saak’ in ET-verhoor

VENTERSDORP. – Uitwysings wat mnr. Eugène Terre’Blanche se minderjarige vermeende moordenaar ure ná die moord gedoen het, gaan nie as ’n bewysstuk in die verhoor toegelaat word nie.

Uitwysings wat sy medebeskuldigde, mnr. Chris Mahlangu (31), gedoen het, sal egter toegelaat word, het regter John Horn in die rondgaande hof hier gesê. Hy sal later redes gee vir dié beslissing in die binneverhoor oor die toelaatbaarheid van die uitwysings.

Adv. Mthunzi Mhaga, woordvoerder van die Nasionale Vervolgingsgesag, het gesê die minderjarige se uitwysings is maar een bewysstuk te midde van talle ander in die staat se baie sterk saak. “Die saak is nog nie verby nie.”

Mnr. Zola Majavu, die minderjarige se regsverteenwoordiger, het die beslissing as ’n oorwinning bestempel, maar gesê daar lê nog harde werk voor.

Die minderjarige was 16 toe hy en Mahlangu die AWB-leier na bewering op 3 April 2010 onverhoeds op sy plaas naby Ventersdorp oorval en met ’n panga en ysterpyp doodgeslaan het.

Die minderjarige se regspan het aangevoer sy regte is geskend deurdat bepalings in die Wet op die Beregting van Kinders nie nagekom is nie. Dit het ingesluit dat ’n proefbeampte hom nie binne 24uur ná sy inhegtenisneming geassesseer het nie en die ondersoekbeampte ’n onderhoud oor die misdaad met hom gevoer het sonder dat sy ma teenwoordig was. Sy klere is verwyder en hy het ure lank net ’n onderbroek gedra en ’n dun kombers om hom gehad, het die hof gehoor.

Adv. Kgomotso Tlouane, vir Mahlangu, het aangevoer sy ­kliënt se regte is gebrekkig aan hom voorgehou weens tolkprobleme en onakkurate verduidelikings. Die twee beskuldigdes is die nag ná die moord (voor die uitwysings) boonop wakker gehou, is aangevoer.

Die staat het teruggekap dat albei beskuldigdes se regte minstens drie keer in Tswana aan hulle verduidelik is en dat hulle gesê het hulle verstaan dit.

Die feit dat ’n proefbeampte die minderjarige nie binne die voorgeskrewe tyd geassesseer het nie, sou volgens die staat nie ’n verskil in die ondersoekproses en uitwysings gemaak het nie.

Die staat het verder beklemtoon dat die minderjarige van ’n uiters ernstige misdryf verdink word en dat sy regte nie met opset of kwade bedoelings geskend is nie.

Albei beskuldigdes het die uitwysings vrywillig gedoen en die gevolge, naamlik dat dit in die hof teen hulle gebruik kan word, deeglik besef, is getuig.

Die verhoor gaan vandag voort.

- Die Burger