Sonpark kan Eskom-druk oor vier jaar help verlig
2012-02-08 00:00
- Artikelopsies
- Deel
- Kry Die Burger op
UPINGTON. – Die konstruksie van die beoogde sonpark, substasies en 400kV-kraglyne hier sal eers teen Oktober 2016 voltooi wees. Dan sal die sonpark tot 1500MW krag aan die Eskom-netwerk kan lewer.
Só is die publiek en ander belanghebbendes op vergaderings van Kathu tot Kenhardt ingelig.
Die vergaderings vorm deel van Zitholele Consulting se omgewingsimpakstudie.
Die publiek is genooi om insae te lewer wat aan die einde van die jaar as deel van die studie aan die departement van omgewingsake gelewer sal word.
Mnr. André Joubert van Zitholele Consulting het gesê konstruksie van die kraglyne sal teen Oktober 2014 begin en teen Oktober 2016 voltooi wees.
Die sonpark self sal na verwagting ook in dié tyd voltooi wees. Die impakstudies van die sonpark is teruggehou omdat die sonpark van 400ha na 800ha vergroot moet word.
Een van die probleme wat deur die publiek geopper is, is die aankoop van grond deur onafhanklike kragleweransiers en die daaropvolgende kunsmatige styging in eiendomspryse.
Verskeie van dié kragleweransiers maak aansprake dat hul deel vorm van dié ontwikkeling.
Volgens die departement van energiesake het slegs Abengoa al omgewingsgoedkeuring gekry om met die konstruksie van ’n onafhanklike sonpark te begin.
Indien mense deur kragleweransiers genader word om grond aan hulle te verkoop, kan hulle op die departement van omgewingssake se webtuiste seker maak dié mense is amptelik goedgekeur.
Die krag van slegs die sonparke rondom Eskom se sonpark sal deur substasies op die Eskom-netwerk ingetrek kan word.
- Die Burger