Selebi ‘sal nie mediese parool kry onder nuwe paroolwet’
2012-02-24 00:00
- Artikelopsies
- Deel
- Kry Die Burger op
PRETORIA. – Daar is geen geldige aansoek om mediese parool vir Jackie Selebi, voormalige polisiehoof, nie.
Clive Derby-Lewis het ook nog geen aansoek om mediese parool ingedien nie, maar wel een om gewone parool, het me. Nosiviwe Mapisa-Nqakula, minister van korrektiewe dienste, gister hier by die bekendstelling van die nuwe mediese paroolraad gesê.
Derby-Lewis (76) is tot lewenslange tronkstraf gevonnis weens die moord op mnr. Chris Hani, voormalige SAKP-leier. Hy het reeds 18 jaar tronkstraf uitgedien en probeer sedert 2007 parool kry.
Prostaatkanker is in Oktober 2010 by Derby-Lewis gediagnoseer. Hy is later daardie jaar ook vir gangreen in sy been en velkanker op sy slape behandel.
Mapisa-Nqakula het in Desember by die opening van die galgkamermuseum in Pretoria gesê Derby-Lewis gaan nie vanjaar op parool vrygelaat word nie. Volgens haar het Derby-Lewis twee jaar gelede in ’n paroolaansoek gesê as hy uit die tronk kom, gaan hy eers rus en daarna alles oor die moord op Hani onthul.
Selebi (61) het chroniese nierversaking en is sedert 19 Desember in die Steve Biko-hospitaal behandel. Hy is op 14 Februarie na die hospitaaleenheid van die Pretoria-Sentraal-gevangenis oorgeplaas. Hy is tot 15 jaar tronkstraf gevonnis nadat hy aan korrupsie skuldig bevind is.
Mapisa-Nqakula het gesê daar was ’n beroep van ’n groep genaamd Vriende van Jackie Selebi vir sy vrylating op mediese parool, maar omdat dit onder die ou wetgewing val, is die aansoek nie geldig nie.
Die wysiging aan die paroolwetgewing, wat op 1 Maart in werking tree, maak daarvoor voorsiening dat die gevangene self, familie of vriende by die mediese paroolraad om mediese parool kan aansoek doen.
Ingevolge die ou wetgewing moes die dokter wat ’n gevangene behandel of die gevangene se fasiliteerder dié aansoek gebring het.
Mapisa-Nqakula het gesê niemand sal op mediese parool vrygelaat word as die mediese paroolraad dit nie goedgekeur het nie.
Daar is tans 268 mediese paroolaansoeke hangende. Volgens mnr. Tom Moyane, nasionale kommissaris van korrektiewe dienste, is 77 aansoeke die afgelope vyf jaar goedgekeur. Die departement van korrektiewe dienste het in ’n verklaring gesê hy verwag die getal mediese paroolaansoeke sal verdubbel wanneer die wetgewing in werking tree.
- Die Burger