Rupert vra vir 'n "Silicon Valley" in die Kaap

“Kom ons skep ’n belasting-neutrale finansiële en IT-sone in die Wes-Kaap.”

Dit is die oproep wat mnr. Johann Rupert, voorsitter van Remgro, gister by die bekendstelling van Silicon Cape gedoen het.

“Ek het reeds met hoë koppe in die ANC oor die moontlikheid gepraat en is bly me. Helen Zille, Wes-Kaapse premier, is ook vandag teenwoordig,” het Rupert gesê.

Hy en Zille het albei gewaarsku dat die oppergesag van die reg en veiligheid in die land gehandhaaf moet word om te sorg dat plaaslike intellektuele eiendom tot ekonomiese groei lei.

Volgens Rupert het Afrika se agterstand teenoor die res van die wêreld niks uit te waai met ras nie, maar met sosialistiese en semi-sosialistiese keuses wat gemaak is. Daarteenoor floreer lande wat private eiendom beskerm, entrepreneurskap verwelkom en waar demokrasie, vryheid van spraak en deursigtigheid in die regering heers.

Dr. Mamphela Ramphele, voorsitter van die Technology Innovation Agency (TIA), beskou Silicon Cape as die begin van grootskaalse innovasie. Sy wil die TIA inspan om ’n gunstige klimaat vir die IT-bedryf te skep deur onder meer regulatoriese hindernisse soos valutabeheer uit die weg te ruim.

Op ’n vraag uit die gehoor oor waarom die IT-bedryf steeds deur wit mans oorheers word en of IT-entrepreneurs uit voorheen benadeelde groepe nie voorkeur by waagkapitaalbeleggers moet geniet nie, het sy gesê swart ekonomiese bemagtiging (SEB) was ’n goeie beleid, maar dit kan veral jong swart mense se vermoë om globaal te dink, skaad.

Silicon Cape word aangedryf deur die Suid-Afrikaanse IT-entrepreneurs mnre. Vinny Lingham van Yola.com en Justin Stanford van 4Di Capital.

Die doelwit is om ’n gesamentlike handelsnaam vir die IT-bedryf in die stad en land te skep om geleenthede ten volle te ontgin.

“Kaapstad het dieselfde mensekomponent wat Silicon Valley so suksesvol gemaak het: rykes en geeks ,” het Lingham geskerts. Ook hy meen meriete en nie SEB nie moet die maatstaf wees.

“Waagkapitaliste soek ’n opbrengs op hul beleggings en ons moet verseker dat die IT-bedryf kommersiële vertroue inboesem. As ons nie die regte omgewing skep nie, gaan Suid-Afrika ’n netto uitvoerder van IT-talent bly,” sê Stanford.

Die geleentheid is deur sowat 500 belangstellendes bygewoon waarvan omtrent die helfte van buite Kaapstad was.

Dit het soveel plaaslike en buitelandse reaksie gelok dat “Silicon Cape” in ’n stadium die naasgewildste gonswoord op die globale sosiale netwerk Twitter