Die eienaar van die rottweiler wat die tweejarige Meeka
Riley Lackay sowat drie weke gelede gebyt het, het gister gevra dat die hond
“privaat van kant gemaak word”.
“Vandag, uit respek vir die familie en kind wat geraak is, het ek,
saam met die res van D (die hond) se familie, besluit om hom privaat van kant te
laat maak. Mag sy siel in vrede rus”, lui ’n verklaring wat mnr. James Lech, ’n
sogenaamde hondefluisteraar van Kaapstad, gisteraand uitgereik het.
D het Meeka op 11 Januarie op Clifton se hoofstrand aangeval.
Die hond is deur lede van die Kaapstadse wetstoepassingsdienste van
Lech weggeneem en in die sorg van die Goede Hoop-dierebeskermingsvereniging
(DBV) in Grassy Park geplaas.
Sedertdien kon niemand aan Die Burger sê wat van die hond gaan word
nie.
Mnr. Neil Arendse van die munisipale wetstoepassingsdepartement het
gister gesê: “Die beampte wat oor die hond moet besluit, is met siekverlof. Die
saak is van ’n sensitiewe aard en ons wag dus op hom om die besluit te
neem.”
Volgens Arendse het die wetstoepassers besluit om twee weke te wag
voordat ’n besluit oor die hond se toekoms geneem word. “Daar is ’n 70%-kans dat
hy van kant gemaak sal word, maar ons kyk na ’n alternatief.”
Lech vra in die verklaring dat mense ook sy pyn verstaan. Hy noem
dat die hond vir rehabilitasie na hom gekom het nadat hy deur ’n voorval in sy
vormingsjare getraumatiseer is. “Ons hoop dat al die wonde van die tragiese
voorval met tyd sal genees.”